BAKI, AzerVoice
İsrail Baş prokurorluğu, Baş nazir Benyamin Netanyahunun korrupsiya işi üzrə məhkəmə prosesinin iki həftəlik təxirə salınması tələbinə rədd cavabı verib.
AzerVoice xəbər verir ki, bu barədə "The Times of Israel" qəzeti məlumat yayıb.
Məlumata görə, Netanyahunun vəkilləri tərəfindən verilən müraciətdə beynəlxalq və regional gərginliklər əsas gətirilsə də, Baş Prokurorluq bu arqumentlərin kifayət etmədiyini bildirib. Qurumun açıqlamasında qeyd olunub ki, ifadəvermə prosesinin ləng getməsi və məhkəmə tətillərinin yaxınlaşması təxirə salma üçün əsas təşkil etmir. Bundan əlavə, Netanyahunun dövlət rəhbəri olaraq öhdəliklərini yerinə yetirməsi üçün artıq ifadə vermə cədvəli həftədə üç dəfə yox, iki dəfə olmaqla dəyişdirilmişdi.
Netanyahunun vəkili Amit Hadad tərəfindən verilən və İranla bağlı gərginliklərə istinad edən təxirə salınma müraciəti, Şərqi Qüdsdə yerləşən Qüds Bölgə Məhkəməsi tərəfindən də rədd edilib. İsrailin 12-ci kanalının məlumatına görə, məhkəmə bu tələbin yetərli əsaslandırma təqdim etmədiyini bildirib.
Qeyd edək ki, İsrail Baş prokuroru Avixay Mandelblit, 21 noyabr 2019-cu ildə Netanyahu barəsində “rüşvət, etimadı pozma və vəzifədən şəxsi məqsədlər üçün istifadə” maddələri üzrə üç ayrı iş üzrə ittiham irəli sürmüşdü. O, İsrail tarixində vəzifədə ikən mühakimə olunan ilk baş nazir kimi tarixə düşüb. İlk dinləmə 2020-ci il mayın 24-də Qüds məhkəməsində keçirilib. Netanyahu sonuncu dəfə ötən il dekabrın 10-da Tel-Əviv məhkəməsində ifadə verib.
Baş nazir rüşvət, dələduzluq və vəzifədən sui-istifadə ilə ittiham olunur.
