BAKI, AzerVoice
Yəməndəki "Ənsar Allah" hərəkatı (Husilər) ABŞ-ın İsrailin İrana qarşı münaqişəsində birbaşa şəkildə dəstək verəcəyi təqdirdə, Qırmızı dənizdəki Amerika gəmilərinə hücum edəcəklər.
AzerVoice xəbər verir ki, bu barədə hərəkatın silahlı qüvvələrinin nümayəndəsi Yəhya Səriənin verdiyi açıqlamada deyilir.
“Əgər ABŞ, İsrailin İrana hücumuna qarışarsa, silahlı qüvvələrimiz Qırmızı dənizdə onların ticarət və hərbi gəmilərini hədəf alacaq” - deyə, o bildirib.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Həqiqi vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
