BAKI, AzerVoice

Qəzzada atəşkəs danışıqları müsbət irəliləyir – razılaşma yaxın görünür.

AzerVoice xəbər verir ki, Qətər Xarici İşlər Nazirliyinin sözçüsü Məcid əl-Ənsari Qəzzada müharibəyə son qoyacaq atəşkəs razılaşması üçün vasitəçilik səylərinin intensivləşdiyini və danışıqların müsbət istiqamətdə davam etdiyini açıqlayıb.

Doha şəhərində keçirilən mətbuat konfransında Ənsari bildirib ki, hazırda İsrail və HƏMAS nümayəndə heyətləri Qətərdədir və hər iki tərəflə ayrıca görüşlər keçirilir. Vasitəçilərin məqsədi – Qəzza zolağında müharibəni dayandıracaq razılaşmanı təmin etməkdir.

Ənsari qeyd edib ki, danışıqlar razılaşmanın ümumi çərçivəsi üzərində aparılır və təfərrüat mərhələsinə hələ keçilməyib. O, danışıqların məzmununun mətbuata sızdırılmasını məsuliyyətsiz davranış kimi dəyərləndirib və yekun nəticə üçün dəqiq vaxt verməyin mümkün olmadığını əlavə edib.

Qeyd edək ki, ABŞ prezidenti Donald Tramp İsrailin Qəzzada 60 günlük atəşkəs üçün əsas şərtləri qəbul etdiyini açıqlayıb. Danışıqlarda vasitəçilik edən Qətər və Misir HƏMAS-a “son təklif” təqdim edəcək. HƏMAS təklifi “müsbət” qiymətləndirdiyini və razılaşma üçün dialoqa hazır olduğunu bildirib.

İsrail tərəfi isə bəzi düzəlişlərin qəbuledilməz olduğunu bildirsə də, danışıqları davam etdirmək üçün nümayəndə heyətini Dohaya göndərib.