BAKI, AzerVoice
İsrailin Qəzza zolağındakı vəziyyətin nizamlanması məqsədilə HƏMAS ilə dolaylı danışıqlarda iştirak edən nümayəndə heyəti Qətərin paytaxtı Dohadan geri çağırılıb.
AzerVoice xəbər verir ki, bu barədə "Əl-Qahira əl-İxbariya" telekanalı məlumat yayıb.
Məlumata görə heyətin bütün üzvləri – o cümlədən texniki məsələlərlə məşğul olan mütəxəssislər də daxil olmaqla ölkəyə qayıdır. Bildirilib ki, İsrail hakimiyyəti bu qərarı danışıqların "uğursuzluğa düçar olduğu" qənaətinə gəldikdən sonra verib.
Xatırladaq ki, Dohada HƏMAS və İsrail arasında Qəzza münaqişəsinin həlli ilə bağlı bir neçə mərhələdə məsləhətləşmələr aparılmışdı. Mayın 20-də Qətərin Baş naziri və Xarici İşlər naziri Şeyx Məhəmməd bin Əbdürrəhman əl-Tani bəyan etmişdi ki, aparılan danışıqlar tərəflərin mövqelərinin yaxınlaşmasına gətirib çıxarmayıb.
"Dohada son həftələr ərzində baş tutan danışıqlar, təəssüf ki, hələlik heç bir nəticə verməyib, çünki iki tərəf arasında fundamental fikir ayrılığı mövcuddur" - deyə, o bildirib.