BAKI, AzerVoice

İsrail girovların azad edilməsi müqabilində Qəzza zolağında müvəqqəti atəşkəsə getməyə hazırdır.

AzerVoice xəbər verir ki, bu barədə İsrailin Baş naziri Binyamin Netanyahu mətbuat konfransında bildirib.

“Əgər belə bir imkan yaranarsa, biz (İsrail - red.) müvəqqəti atəşkəsə hazırıq” – deyə, Netanyahu bildirib.

O həmçinin qeyd edib ki, əgər HƏMAS bütün girovları azad etsə, Qəzza tamamilə demilitarizasiya olunsa və HƏMAS Qəzza zolağını tərk etsə, İsrail müharibəni dayandırmağa hazır olacaq.

“Müharibəyə yalnız konkret şərtlər daxilində son qoymağa hazıram. Bu şərtlər İsrailin təhlükəsizliyini təmin etməlidir: bütün girovlar evlərinə qayıdır, HƏMAS silahlarını yerə qoyur, HƏMAS rəhbərliyi Qəzzadan qovulur, Qəzza tam şəkildə silahsızlaşdırılır və biz ABŞ Prezidenti Donald Trampın planını həyata keçiririk” – deyə, Netanyahu vurğulayıb.

Baş nazir onu da qeyd edib ki, “Gideonun Əjdahaları” adlı hərbi əməliyyat başa çatdıqdan sonra Qəzza zolağının bütün bölgələri İsrail təhlükəsizlik qüvvələrinin nəzarətində olacaq.

“Əməliyyat bitdikdən sonra Qəzza zolağının bütün hissələri İsrail qüvvələrinin nəzarətində olacaq və HƏMAS tamamilə darmadağın ediləcək” – deyə, o bildirib.

Netanyahu bu məqsədlə Qəzzada humanitar böhranın qarşısını almağın zəruri olduğunu bildirib.

“Əməliyyat azadlığımızı təmin etmək və dostlarımızın bizə dəstəyi davam etdirməsinə şərait yaratmaq üçün humanitar yardım göstərilməlidir”, - Netanyahu qeyd edib.

Netanyahu həmçinin bildirib ki, İsrail ordusu ehtimala görə, Qəzza zolağında HƏMAS-ın liderlərindən biri – Məhəmməd Sinvarı zərərsizləşdirib. Mayın 13-də İsrail Müdafiə Qüvvələri Xan Yunis şəhərində Avropa Xəstəxanasının altındakı yeraltı qərargaha zərbə endirdiyini açıqlayıb. Zərbənin hədəfi HƏMAS-ın Qəzzadakı rəhbəri və təşkilatın hərbi qanadı – “İzzəddin əl-Qəssam Briqadaları”nın başçısı olan Məhəmməd Sinvar olub. Bu barədə həmin gün İsrailin dövlət yayım şirkəti “Kan” məlumat yayıb.