BAKI, AzerVoice
İsrail, Yəməndəki “Ənsar Allah” (husilər) hərəkatının raket hücumlarına cavab olaraq bu ölkəyə zərbələr endirməyə davam edəcək və təşkilatın lideri Əbdül Malik əl-Husini ortadan qaldırmağa hazırdır.
AzerVoice xəbər verir ki, bu fikirləri İsrailin müdafiə naziri İsrael Kats, İsrail Hərbi Hava Qüvvələrinin Yəməndəki limanlara hava zərbələri endirdikdən sonra səsləndirib.
Kats xatırladıb ki, İsrail ordusu daha əvvəl HƏMAS-ın hərbi qolunun rəhbəri Məhəmməd əd-Deifi, həmçinin bu təşkilatın lideri Yahya Sinvarı, şiə “Hizbullah” təşkilatının baş katibi Həsən Nəsrullanı və HƏMAS-ın siyasi bürosunun rəhbəri İsmayıl Haniyyəni aradan qaldırıb.
“Dediyimiz kimi, əgər husilər İsraili raketlərlə vurmağa davam etsələr, ağır zərbələr alacaqlar. Biz terrorun rəhbərlərinə də zərbə endirəcəyik – Qəzzada əd-Deif və Sinvarlara, Beyrutda Nasrullaha, Tehranda Haniyyəyə etdiyimiz kimi. Biz Əbdül Malik əl-Husini də Yəməndə tapıb məhv edəcəyik. İsrail dövləti olaraq hər bir düşmənə qarşı öz gücümüzlə müdafiə olunacağıq” - deyə, Kats bildirib.
Bundan əvvəl İsrail ordusunun mətbuat xidməti Yəməndəki yeni hava hücumları barədə məlumat yaymışdı. Bu hücumlar, Qırmızı dəniz sahilində husilərin nəzarətində olan Əl-Hudeyda əyalətində yerləşən Hudeyda və Əs-Salif limanlarını hədəf alıb. İsrail tərəfinin iddiasına görə, bu limanlar üsyançılar tərəfindən silah daşınması üçün istifadə olunurdu.
