Ramallah, AzerVoice
İsrail hərbi kəşfiyyatının elit bölməsinin komandiri Yossi Sariel HƏMAS-ın oktyabrın 7-də hücumunun qarşısını ala bilmədiyi üçün istefa verdiyini açıqlayıb.
AzerVoice ArabAZ-a istinadən xəbər verir ki, Sariel istefa ərizəsini İsrail Baş Qərargah rəisi Herzi Haleviyə təqdim edib.
Qeyd edək ki, daha öncə, HƏMAS-ın hücumunun qarşısını ala bilməməkdə günahlandırılan İsrail Hərbi Kəşfiyyat Xidməti (AMAN) komandiri general Aaron Haleva 2024-cü ilin aprelində istefa verən ilk yüksək rütbəli zabit olmuşdu.
Məlumat üçün bildirək ki, bu ilin iyun ayında Kan ictimai televiziyası 8200 saylı bölmənin 19 sentyabr tarixli hesabatının olduğu ilə bağlı açıqlama vermişdi. Bu hesabatda HƏMAS hərəkatının elit bölmələri tərəfindən İsrailin cənubundakı hərbi obyektlərə hücüm haqqında məlumatlar yer alırdı.
İsrailin baş naziri Benyamin Netanyahu isə Qəzzada müharibə bitməmiş 7 oktyabr hücumu ilə bağlı rəsmi araşdırma başlatmaqdan qəti şəkildə imtina edir.
