BAKI, AzerVoice

İsrail Hərbi Hava Qüvvələrinə (HHQ) məxsus qırıcı təyyarələr Suriyanın mərkəzində yerləşən Hums vilayətində Suriya Silahlı Qüvvələrinə məxsus anbarlara hava zərbələri endirib.

AzerVoice xəbər verir ki, bu barədə “Əl-Məyadin” telekanalı məlumat yayıb.

Məlumata görə, hücumlar Hums şəhərindən 100 km cənub-şərqdə yerləşən Şinşar bölgəsinə yönəlib. Hücumun nəticələri barədə əlavə məlumat verilməyib.

Suriyaya sonuncu dəfə hava zərbələri iyulun 17-də endirilmişdi. Həmin vaxt hava hücumları ölkənin şimal-qərbində yerləşən Bzamilə bölgəsindəki 132-ci motoatıcı briqadanın və Cəblədəki 107-ci tank briqadasının bazalarını hədəf almışdı.

İyulun 16-da isə İsrail HHQ Dəməşq və ətrafında yerləşən bir sıra strateji obyektlərə hücumlar həyata keçirmişdi. Zərbələr Suriya ordusunun baş qərargahının binasına və Əbu-Rummana məhəlləsində yerləşən prezident sarayına endirilmişdi.

Bundan əvvəl İsrailin müdafiə naziri İsrael Katz xəbərdarlıq etmişdi ki, əgər Suriya hökumət qüvvələri ölkənin cənubunda, druzların yaşadığı Suveyda şəhəri və ətraf bölgələrdən çıxarılmasa, İsrail hücumlarını davam etdirəcək.

Qeyd edək ki, iyulun 19-da Suriyanın prezidenti Əhməd əş-Şəraa beynəlxalq vasitəçilərin iştirakı ilə hazırlanmış sülh planı çərçivəsində ölkənin cənub vilayətinin bütün ərazisində atəşkəs rejiminin tətbiq olunduğunu elan etmişdi.