BAKI, AzerVoice

Türkiyə Prezidenti Rəcəb Tayyib Ərdoğan NATO Zirvəsində iştirak etmək üçün Hollandiyaya yola düşməzdən əvvəl mühüm açıqlamalar verib.

AzerVoice xəbər verir ki, O, Avropa təhlükəsizliyindən Fələstin böhranına qədər bir çox məsələyə toxunub.

Ərdoğan bildirib ki, Türkiyə öz müdafiə qabiliyyətini artırmaqla yanaşı, müttəfiqlik ruhuna uyğun şəkildə ittifaqın güclənməsinə töhfə verməkdə qərarlıdır.
"Müttəfiqlər arasında müdafiə sənayesi sahəsində ticarətə tətbiq olunan blokadaların heç bir əsasının olmadığını düşünürük və bu məhdudiyyətlər aradan qaldırılmalıdır," – deyə Prezident vurğulayıb.

Ərdoğan NATO sammitində Türkiyənin ittifaq daxilində terrorla mübarizəyə verdiyi töhfələrin də ön plana çıxarılacağını qeyd edib. O, Ukrayna müharibəsinə toxunaraq bildirib ki, Türkiyə həm Rusiya, həm də Ukrayna tərəfindən etimad görən nadir ölkələrdən biridir
“Biz bu müharibənin bitməsi üçün diplomatik cəhdlərimizi davam etdirəcəyik. İstanbulda baş tutan danışıqlar sülhə gedən yolda atılmış mühüm addım idi.” - deyə o qeyd edib.

Prezident, eyni zamanda, Fələstin mövzusunda da qətiyyətli mövqe sərgiləyib.
"İşğalçılıq və dağıdıcı siyasət sona çatmalıdır. Biz bu məsələləri NATO platformasında da gündəmə gətirəcəyik." - deyə o bildirib.

İsrail və İran arasında son günlərdə yaşanan gərginliyə dair isə Ərdoğan qeyd edib ki, Türkiyə bu prosesdə atəşkəsə nail olmaq üçün müxtəlif beynəlxalq tərəfdaşlarla sıx təmasda olub. O, gecə saatlarında əldə edilən atəşkəs razılaşmasını müsbət qiymətləndirib.

Prezident sonda 2026-cı ildə NATO sammitinə Türkiyənin ev sahibliyi etmək niyyətində olduğunu bildirib və sammitdə faydalı qərarların veriləcəyinə ümid etdiyini söyləyib.