BAKI, AzerVoice

İsrail İrana qarşı heç bir hədəfə nail ola bilmədi.

AzerVoice xəbər verir ki, bu barədə İran Prezidenti Məsud Pezeşkian xalqa müraciyətində deyib.

"Hərçənd ki, bəzi həmvətənlərimizin, qadın və uşaqlarımızın, alimlərimizin və igid komandirlərimizin şəhid olması və infrastruktur obyektlərinə dəyən zərər ölkəmiz üçün böyük bir itki hesab olunur, lakin düşmənə (İsrail nəzərdə tutulur - red.) dəyən zərər, bütün media senzurasına baxmayaraq, təsəvvür ediləndən qat-qat çox olub. Düşmən rejim atom infrastrukturlarını məhv etmək, nüvə elmini sıradan çıxarmaq və sosial ayrıseçkilik yaratmaq planlarında uğursuz oldu. Əvəzində, sionist rejimin məğlubedilməzlik mifinin çökməsi və onun əsas obyekt və qurumlarının geniş şəkildə məhv edilməsi dünyaya bu mühüm mesajı verdi: Böyük İranla qarşıdurmanın bədəli son dərəcə ağırdır" - deyə, o bildirib.

Pezeşkian İsraillə atəşkəsin əldə olunması və münaqişənin dayandırılması münasibətilə İran xalqına təşəkkür edib.

"Biz bu dəyərli birlik və həmrəyliyi davam etdirməyə çalışmalıyıq. Bu gündən etibarən daha parlaq bir gələcək və daha güclü bir İran üçün birlikdə və çiyin-çiyinə çalışacağıq. Əziz xalqımıza dərin təşəkkürümü bildirirəm. Xüsusilə İran İslam Respublikası Ordusu, İslam İnqilabı Keşikçiləri Korpusu (SEPAH), Polis Qüvvələri (Fəraja), Bəsic qüvvələri, Kəşfiyyat və Müdafiə nazirlikləri, yanğınsöndürənlər, Qızıl Aypara, tibb işçiləri, xidmət sahəsində çalışanlar, media nümayəndələri, sənətçilər, idmançılar və bu böyük tarixi mərhələdə öz möhtəşəm rolunu oynayan siyasi və ictimai fəallara minnətdarlığımı bildirirəm. Bütün dövlət qurumları, nazirliklər və qurumlar bu gündən etibarən zərərçəkmişlərə dəymiş ziyanın aradan qaldırılması və bərpa işlərinə yönələcək" - deyə, Pezeşkian vurğulayıb.

Pezeşkian həmçinin, İranın qonşu islam ölkələri arasında sülh və sabitliyə xidmət etdiyinə xüsusi vurğu edib:

"Qonşu və region ölkələrinə də bildirmək istəyirəm ki, İran İslam Respublikasının gücü və müdafiə bacarığı həmişə qardaş islam ölkələri və tarixi qonşular arasında sülh və dostluğa xidmət edib və edəcək. Hamımızın ayıqlığı, aramızda təfriqə və ixtilaf yaratmaq istəyən düşmənlərin planlarını puç edəcək. İnşallah" - deyə, o yekunlaşdırıb.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.

ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.

ABŞ prezidenti Donald Trampın bəyanatına əsasən, İsrail və İran tam atəşkəsə razılıq veriblər. İsrail hakimiyyəti ABŞ-ın təklifini qəbul etdiyini və qarşıya qoyulan bütün məqsədlərə nail olunduğunu bəyan edib.