BAKI, AzerVoice

Hakan Fidan qeyd edib ki, Azərbaycanın ərazi bütövlüyü və suverenliyinin qorunması bütün türk dünyasının ortaq prinsipinə çevrilib. O əlavə edib ki, TDT ölkələri bu məsələdə vahid mövqe sərgiləməkdə qərarlıdır.

AzerVoice xəbər verir ki, Türkiyənin xarici işlər naziri Hakan Fidan Türk Dövlətləri Təşkilatının (TDT) Qeyri-rəsmi Zirvə Toplantısı çərçivəsində çıxış edərək bölgədəki əsas geosiyasi proseslərə dair mühüm açıqlamalar verib.

Fidan çıxışına Türkiyənin bundan sonra da Azərbaycanın yanında olacağını vurğulayaraq başlayıb və qardaşlığın sarsılmaz olduğunu bir daha diqqətə çatdırıb.

Nazir qeyd edib ki, Rusiya-Ukrayna müharibəsində diplomatik həllə doğru yeni bir mərhələyə keçid edilir. Fidan, İstanbulda Rusiya və Ukrayna nümayəndələrinin iştirakı ilə keçirilən son görüşlərin bu istiqamətdə yeni dövrə pəncərə açdığını bildirib. “Gərgin diplomatik səylərimizin nəticəsi olaraq tərəflərin bir araya gəlməsi əhəmiyyətli başlanğıcdır. Ümid edirik ki, bu təşəbbüs atəşkəs və ədalətli sülhə yol açacaq”- deyə o bildirib.

Nazir çıxışı zamanı Fələstin məsələsinə də toxunub və Qəzzada mülki əhaliyə qarşı tətbiq edilən aclığın bir növ silaha çevrilməsini qəbuledilməz adlandırıb. O, İsrailin Qəzzada əməliyyatlarını genişləndirməsinin davamlı sülhə olan istəksizliyini bir daha göstərdiyini vurğulayıb. Fidan beynəlxalq ictimaiyyəti bu məsələdə daha qətiyyətli addımlar atmağa çağırıb və Türk Dövlətləri Təşkilatının da bu məsələdə ortaq mövqe sərgiləməsinin vacibliyini qeyd edib.

Nazir həmçinin Livan və Suriyaya yönəlik İsrail hücumlarının yaratdığı təhlükələrə toxunaraq, Suriyada sabitlik üçün tarixi fürsətin mövcud olduğunu qeyd edib. O bildirib ki, Türkiyənin diplomatik səyləri və bölgə ölkələri ilə koordinasiyası nəticəsində müəyyən irəliləyişlər əldə edilib və bu prosesdə Türk dövlətlərinin dəstəyinin önəmi böyükdür.

Fidan Əfqanıstandakı vəziyyəti də diqqətə çatdıraraq, türk mənşəli icmaların bu ölkədəki mövcudluğunun TDT ilə Əfqanıstan arasında mədəni və tarixi bağları gücləndirdiyini bildirib. O, təşkilat çərçivəsində yaradılan Əfqanıstan İşçi Qrupunun daha fəal fəaliyyət göstərməli olduğunu deyib.

Sonda, Fidan həm NATO, həm də Aİ çərçivəsində göstərilən diplomatik dəstəyə görə litvalı həmkarı Peterə də təşəkkür edib və İstanbulda baş tutan görüşlərin davamlı siyasi həll üçün real zəmin yaratmasını arzulayıb.