BAKI, AzerVoice

Bu gün bir daha bəyan edirəm: Canımız bahasına bu torpaqları (Kipri red.) müdafiə etməyə hazırıq.

AzerVoice xəbər verir ki, bu sözləri Türkiyə prezidenti Rəcəb Tayyib Ərdoğan Şimali Kipr Türk Respublikasında "Teknofest KKTC" festivalında çıxış edərkən deyib.

"Bunu bilməyənlər bilsin, eşitməyənlər eşitsin: Bu torpaqlar bizə şəhidlərimizin mirası və əmanətidir. Burada silinməz xatirələrimiz var. 51 il əvvəl burada idik, bu gün də buradayıq. Bu fürsətlə qanları ilə dastan yazan bütün şəhidlərimizi rəhmət, minnət və şükranla yad edir, həyatda olan qazilərimizə Uca Allahdan xeyirli və sağlam ömürlər diləyirəm" - deyə, o əlavə edib.

Türkiyə prezidenti həmçinin, Teknofesti Türk millətinin gələcəyi üçün atılan vacib bir addım kimi qiymətləndirib.

"Teknofest KKTC yalnız bir festival deyil, eyni zamanda Türk milləti ilə Kipr türklərinin – iki dövlət olaraq ortaq gələcəyə doğru atdığı qətiyyətli bir addımdır. Biz Türk milləti və Kipr türkləri olaraq bu torpaqlarda qonaq yox, ev sahibiyik" - deyə, Ərdoğan bildirib.

Bununla yanaşı Ərdoğan, Türkiyənin milli texnologiya sahəsində əldə etdiyi uğurlara da diqqət çəkib.

"Tam müstəqil Türkiyə idealımız naminə yerli və milli texnologiya həmləmizi başlatdıq. Bu gün pilotsuz uçuş aparatlarında gəldiyimiz səviyyədə, şübhəsiz ki, mərhum Özdemir Bayraktarın böyük payı var. Bu işə başladıqda bizə “boşuna ümidlənməyin, edə bilməzsiniz, bacarmazsınız” deyənlərə bu gün ən gözəl cavabı sizinlə birlikdə veririk" - deyə, Ərdoğan vurğulayıb.

Ərdoğan, son zamanlar Türkiyədə gündəmdə olan müxalifət ilə bağlı qalmaqalların təkrarlanmayacağına xüsusi vurğu edib.

"Sizdən aldığımız ilham və sizin istehsal etdiyiniz texnologiyalarla daha güclü bir Türkiyə və daha rifahlı bir Şimali Kipr Türk Respublikasını inşa edəcəyik. Son dövrdə ictimaiyyətimizi narahat edən saxta diplom kimi utancverici qalmaqallar bir daha təkrarlanmayacaq. Gənclərimizin haqlarının tapdanmasının qarşısını alırıq və almağa davam edəcəyik" - deyə, Ərdoğan qeyd edib.