Bakı, AzerVoice
İsrail hökuməti bazar günü keçiriləcək iclasda Qəzza sakinlərinin yumşaq köçürülməsi planını müzakirə edəcək.
AzerVoice-un məlumatına görə, bu plan ilk olaraq köçmək istəyən fələstinliləri başqa bir ölkəyə köçməyə təşviq etməyi nəzərdə tutur.
Bəzi mənbələrin məlumatına görə, yumşaq köçürmə planı İsrailin beynəlxalq ictimaiyyət tərəfindən zorla köçürmə ittihamı ilə üzləşməməsi üçün hazırlanıb. Çünki bu, beynəlxalq səviyyədə müharibə cinayəti kimi dəyərləndirilə bilər.
Mənbələr bildirir ki, bu plan Ağ Evdə Tramp tərəfindən ortaya atılsa da, onun bunu yalnız bir təklif kimi irəli sürdüyü, faktiki icranın isə İsrailin üzərinə düşdüyü qeyd edilir. Bu səbəbdən Qəzzalıları köçürmək üçün yumşaq metodlar tətbiq edilməli olduğu vurğulanıb.
Müstəqil BMT insan haqları ekspertləri isə İsrailin yumşaq köçürmə iddiasına inanmadıqlarını bildiriblər. Onların fikrincə, İsrail Qəzzada aclıq silahından istifadə etməyə davam edir. İsrailin atəşkəs razılaşmasını pozması və humanitar yardımların girişinə mane olması bu iddianın əsas sübutu kimi göstərilib.
Ekspertlər bildiriblər ki, İsrailin Qəzzaya ərzaq və tibbi yardımları qəsdən dayandırması, insan haqları qanunlarını və beynəlxalq humanitar hüququ açıq şəkildə pozur. Bunun müharibə cinayəti və insanlıq əleyhinə cinayət kimi Roma Əsasnaməsinə uyğun şəkildə qiymətləndirilməli olduğu vurğulanıb.
