BAKI,AzerVoice, Fərid Mikayılov

Meyvə və tərəvəzlə zəngin qidalanmanın yuxu rejimindən ürək sağlamlığına, beyin və bağırsaq funksiyalarından immunitet sisteminə qədər bir çox sahədə faydalı olduğu uzun müddətdir məlumdur.

ABŞ-ın Loma Linda Universitetində epidemioloq Qari Freyzerin rəhbərlik etdiyi tədqiqat qrupu vegetarian və vegan qidalanmanın bəzi xərçəng növlərinə qarşı da güclü qoruyucu təsir göstərdiyini açıqlayıb.

2002–2007-ci illər arasında ABŞ və Kanadada yaşayan 79 min 468 nəfərin sağlamlıq göstəriciləri izlənib və 2015-ci ilə qədər onların vəziyyəti müşahidə olunub.

Vegetarianlarda mədə xərçənginə yoluxma riski 45 faiz,

Lenfoma riski 25 faiz azalıb.

Bütün xərçəng növləri birlikdə qiymətləndirildikdə isə risk ümumilikdə 12 faiz aşağı olub.

Alimlər xüsusən həzm sistemi ilə bağlı xərçənglərdə bu təsirin daha qabarıq göründüyünü bildirirlər. Çünki bu orqanlar qidalar və onların parçalanması zamanı yaranan maddələrlə birbaşa təmasdadır.

Mütəxəssislər vurğulayıb ki, ət məhsullarının, xüsusilə emal olunmuş ətlərin, həm mədə, həm də bağırsaq xərçəngində ciddi risk faktoru olduğu artıq sübuta yetirilib. Bunun əksinə, meyvə-tərəvəz, xüsusən də sitrus meyvələri və sağlam bişirmə üsulları (ızgara, buğulama və s.) qoruyucu təsir göstərə bilir.

Tədqiqatçılar qeyd edirlər ki, nəticələr əhəmiyyətli olsa da, bu, qəti səbəb-nəticə əlaqəsini sübut etmir. Vegetarian qidalanmanı seçən insanların çox vaxt idman və sağlam həyat tərzinə daha çox üstünlük verməsi də nəticələrə təsir edə bilər.

Bundan başqa, yanlış planlaşdırılmış vegetarian pəhrizində bəzi vitamin və mineral çatışmazlıqları yarana bilər. Alimlərin əsas tövsiyəsi isə tamamilə vegan olmaq deyil, gündəlik rasionda meyvə və tərəvəzin payını artırmaqdır.