BAKI,AzerVoice
Uzun illər Sovet İttifaqına rəhbərlik edən Leonid Brejnevın dünyasını dəyişməsindən sonra Yuri Andropov Kommunist Partiyasının yeni Baş katibi seçildi. Bu, Andropovun Kommunist Partiyası iyerarxiyasında uzun, lakin davamlı yüksəlişinin məntiqi nəticəsi idi.
1914-cü ildə Rusiyada doğulan Andropov 1930-cu illərdə Kommunist Gənclər İttifaqının fəal üzvü kimi fəaliyyət göstərirdi. İkinci Dünya Müharibəsi zamanı o, nasistlərin arxa cəbhəsində fəaliyyət göstərən partizan dəstəsinə rəhbərlik edib. Bu fəaliyyət ona Moskvada müxtəlif vəzifələr qazandırdı və 1954-cü ildə o, SSRİ-nin Macarıstandakı səfiri təyin olundu.
1956-cı il Macarıstan böhranı zamanı Andropov Kreml üçün etibarlı fiqur olduğunu sübut etdi. O, Macarıstanın Baş naziri İmre Naqya Sovet ordusunun niyyətləri haqda yalan məlumat verdi və onu hər cür repressiyadan qorunacağına inandırdı. Lakin 1956-cı ilin noyabrında sovet tankları Budapeştə daxil oldu, Naq hakimiyyətdən uzaqlaşdırıldı və 1958-ci ildə edam edildi.
Bu hadisələr Andropovun siyasi yüksəlişini sürətləndirdi və o, Moskvaya geri çağırılaraq Kommunist Partiyasında daha yüksək vəzifələrə gətirildi. 1967-ci ildə Andropov SSRİ Dövlət Təhlükəsizlik Komitəsinin - KQB-nin rəhbəri təyin olundu.
Sərt siyasi xəttin tərəfdarı kimi o, 1968-ci ildə Çexoslovakiyaya hərbi müdaxiləni dəstəkləyir, həmçinin Andrey Saxarov və Aleksandr Soljenitsın kimi dissidentlərə qarşı təzyiqlərə rəhbərlik edirdi. 1982-ci ildə Brejnev ağır xəstələndikdən sonra Andropov KQB-ni tərk etdi və siyasi liderlik uğrunda mübarizəyə başladı. Brejnev 10 noyabr 1982-ci ildə öldükdə Andropov hakimiyyəti ələ almağa hazır idi və 12 noyabrda Baş katib elan olundu.
Onun hakimiyyəti qısa sürdü, lakin hadisələrlə zəngin oldu. Daxili siyasətdə o, zəifləyən Sovet iqtisadiyyatını canlandırmağa, korrupsiyaya qarşı mübarizə aparmağa və əhali arasında artan alkoqolizmə qarşı tədbirlər görməyə çalışdı.
Xarici siyasətdə isə Andropov ABŞ Prezidenti Ronald Reyqanın qəti antikommunist kursu ilə qarşılaşdı. 1983-cü ilin sentyabrında sovet pilotlarının Koreya sərnişin təyyarəsini vurması iki ölkə arasında münasibətləri kəskin gərginləşdirdi. Həmin ilin sonunda SSRİ Orta və Yaxın Mənzilli Raketlərin Azaldılması üzrə danışıqları, eləcə də START müzakirələrini dayandırdı.
1983-cü ilin əvvəlindən ağır xəstəliklərlə mübarizə aparan Yuri Andropov 9 fevral 1984-cü ildə vəfat etdi. Onun yerinə Konstantin Çernenko gətirildi.