BAKI, AzerVoice

Qəzza İsrailin qeyri-qanuni məhdudiyyətləri səbəbindən aclıq astanasındadır.

AzerVoice xəbər verir ki, BMT-nin İnsan Haqları üzrə Ali Komissarlığının sözçüsü Thameen Əl-Kheetan Qəzza zolağında humanitar vəziyyətin kritik həddə çatdığını bəyan edib.

O, İsrailin tətbiq etdiyi qeyri-qanuni blokada və yardım məhdudiyyətləri səbəbilə bölgənin “aclıq astanasında” olduğunu vurğulayıb.

Əl-Kheetan bu açıqlamanı BMT-nin Cenevrədə keçirilən həftəlik mətbuat konfransında səsləndirib. O bildirib ki, Qəzzada insanlar yemək almağa çalışarkən ya ac qalmaq, ya da öldürülmək riski ilə üz-üzədir. Onun sözlərinə görə, 27 may tarixində ABŞ və İsrailin dəstəklədiyi “Qəzzaya Humanitar Yardım Fondu”nun paylama nöqtələrinə yaxınlaşan fələstinlilər İsrail ordusu tərəfindən bombalanıb və güllələnib.

BMT sözçüsü baş verənlərlə bağlı təcili və qərəzsiz beynəlxalq təhqiqat aparılmasına, məsul şəxslərin hüquqi cavabdehlik daşımasına çağırıb. O, mülki şəxslərin silahla öldürülməsinin beynəlxalq hüququn ciddi şəkildə pozulması və müharibə cinayəti olduğunu qeyd edib.

Əl-Kheetan həmçinin bildirib ki, İsrail yerli qida istehsalı və iqtisadi infrastrukturu sistemli şəkildə məhv edir, BMT və digər humanitar qurumların fəaliyyətinə ciddi məhdudiyyətlər tətbiq edir.

Əl-Kheetan İsraili beynəlxalq humanitar hüquqa əməl etməyə, yardımın maneəsiz çatdırılmasını təmin etməyə və BMT qurumlarının işinə qoyduğu məhdudiyyətləri dərhal aradan qaldırmağa çağırıb. O əlavə edib ki, üçüncü dövlətlər də işğal altındakı əhalinin ərzaq və zəruri ehtiyaclarını təmin etmək üçün məsuliyyət daşıyır.

Qeyd edək ki, 7 oktyabr 2023-cü ildən etibarən İsrailin Qəzzaya hücumları nəticəsində bölgədə genişmiqyaslı humanitar fəlakət yaşanır. İnfrastrukturun dağıdılması, aclıq, məcburi köçkünlük və blokadalarla yanaşı, İsrailin BMT-nin və beynəlxalq məhkəmələrin atəşkəs çağırışlarına baxmayaraq hücumlarını davam etdirməsi beynəlxalq səviyyədə ciddi narahatlıq doğurur.