BAKI, AzerVoice
17 May 2025-ci il tarixində Türk Mədəniyyəti və İrsi Fondunun dəstəyi və TİKA-nın yardımı ilə “Türk Dünyasında Sualtı Mədəni İrsin Qorunması ilə bağlı Xüsusi Panel” təşkil edilib.
AzerVoice xəbər verir ki, panel, 14-23 May 2025-ci il tarixləri arasında Antalyanın Kəmər bölgəsində keçirilən 24-cü Beynəlxalq Kəmər Sualtı Günləri və CMAS Sualtı Mədəni İrsin Qorunması Seminarı çərçivəsində baş tutub. Tədbirlər Akdeniz Universiteti, Sualtı Arxeologiya Tətqiqat və Tətbiq Mərkəzi ilə Kəmər Təbliğat Fondu tərəfindən həyata keçirilib.
Azərbaycan, Qazaxıstan, Qırğızıstan, Türkiyə, Macarıstan və Özbəkistandan mütəxəssis və alimlərin qatıldığı bu sessiyada türk dünyasında sualtı mədəni irs və sualtı arxeologiya sahəsində görülən işlər təqdim olunacaq, gələcəyə dair perspektivlər dəyərləndirilib.
Xüsusi panelin ardından türk dünyasında sualtı mədəni irsin qorunması və bu sahədə əməkdaşlığın gücləndirilməsi məqsədilə dəyirmi masa müzakirəsi keçirilib. Müxtəlif ölkələrdən gələn elm adamlarını və rəsmi nümayəndələri bir araya gətirən görüş, həm elmi fikir mübadiləsi, həm də beynəlxalq əməkdaşlıq imkanları baxımından əhəmiyyətli platformaya çevrilib.
Türkiyənin bu sahədəki zəngin təcrübəsi və mütəxəssis biliyi iştirakçılarla praktik formatda paylaşıldığı seminar və təlimlər 23 may 2025-ci il tarixində yekunlaşacaq.
