BAKI, AzerVoice
Ukrayna, xarici tərəfdaşlarla birlikdə Rusiyanın hücumlarına qarşı müdafiə məqsədilə uzaqmənzilli silahların və dron-interseptorların istehsalını artıracaq.
AzerVoice xəbər verir ki, bu barədə Ukrayna Prezidenti Volodimir Zelenski “X” sosial şəbəkə hesabında məlumat verib.
Onun sözlərinə görə, Kiyev Danimarka ilə Ukrayna üçün xaricdə birgə silah istehsalına dair saziş imzalayıb. Ukraynanın Strateji Sənaye Sahələri üzrə naziri German Smetanin bildirib ki, Danimarka Ukraynanın öz müdafiə texnologiyalarını ixrac edəcəyi və bu texnologiyalar əsasında istehsal, miqyaslandırma və Ukrayna ordusuna tədarük həyata keçirəcəyi ilk ölkə olacaq.
Ukrayna, həmçinin ABŞ-ın “Swift Beat” şirkəti ilə pilotsuz uçuş aparatları (PUA) üzrə ayrıca saziş bağlayıb. Zelenski daha əvvəl bu çərçivədə Ukraynanın yüz minlərlə dron, o cümlədən interseptor-dron alacağını bildirmişdi. Prezident Ofisinin verdiyi məlumata görə, sənəd şirkətin istehsal gücünün genişləndirilməsini, dronların Ukraynaya prioritetli şəkildə, xüsusi şərtlərlə və maya dəyərinə uyğun olaraq tədarük edilməsini nəzərdə tutur.
Bu həftənin əvvəli Zelenski Avropa tərəfdaşları ilə Ukrayna Silahlı Qüvvələrinə yardımın “Danimarka modeli”nin genişləndirilməsini müzakirə etməyi planlaşdırdığını bildirib. Bu modelə əsasən, Avropa ölkələri Ukraynada silah istehsalına və bu istehsalın maliyyələşdirilməsinə dəstək verirlər.
Ukraynanın Baş naziri Denis Şmıqal isə mart ayında bəyan edib ki, ölkə döyüş meydanında ehtiyac duyduğu silahların təxminən üçdə birini özü istehsal edir və bu göstəricini 50 faizə çatdırmaq niyyətindədir.
