BAKI, AzerVoice
Birləşmiş Ərəb Əmirliklərinin (BƏƏ) milli hava yolu şirkəti "Emirates" İranda uçuşlara qoyulan məhdudiyyəti uzadaraq, Dubay və Tehran arasında 5 iyul da daxil olmaqla bütün reysləri ləğv edib.
AzerVoice xəbər verir ki, bu barədə "Emirates"in bəyanatında deyilir.
Bəyanata əsasən, bu qərar regiondakı vəziyyətlə əlaqədardır. Eyni zamanda hava yolu şirkəti İraqa uçuşların bərpa olunduğunu elan edib. Dubay–Bağdad və Dubay–Bəsrə reysləri müvafiq olaraq 1 və 2 iyul tarixlərindən yenidən həyata keçiriləcək.
Qeyd edək ki, İran iyunun 25-dən hava məkanını tədricən açmağa başlayıb. İyunun 28-də İran hakimiyyəti ölkənin mərkəzi bölgəsi və qismən qərb hissələri üzərindən beynəlxalq hava yollarına uçuşlara icazə verildiyini açıqlayıb. İranın hava məkanı iyunun 13-dən etibarən, İsrailin ölkəyə qarşı hərbi əməliyyata başlamasından sonra bağlı qalırdı.
