BAKI, AzerVoice
"Demokratik Güclər" adı altında gizlənən və ABŞ tərəfindən dəstəklənən terror qruplaşması ilə Suriya hökumət qüvvələri arasında toqquşma qaçılmazdır".
AzerVoice xəbər verir ki, bu sözləri Qaynarinfo-ya açıqlamasında siyasi şərhçi Rufiz Hafizoğlu kürdlərin rəhbərlik etdiyi terrorçu Suriya Demokratik Qüvvələrinin (SDQ) bölmələri ilə Suriya ordusu arasında baş verən insidenti şərh edərkən deyib.
Ekspert bildirib ki, Suriya ilə İsrail arasında detalları açıqlanmayan danışıqlar gedir:
"Böyük ehtimalla tərəflər bu danışıqlarda sülhə yaxın bir nəticə əldə edəcəklər. Suriya ilə İsrail arasında da "sülh" müqaviləsi imzalanacaq".
Ekspert qeyd edib ki, burada həll olunmayan iki məsələ var:
"Biri druzlarla bağlı məsələdir. Böyük ehtimalla Təl-Əviv sülh adlanan bu müqavilə çərçivəsində druzları öz himayəsinə götürəcək və Dəməşq də bunu qəbul edəcək. Başqa variant yoxdur".
Rufiz Hafizoğlu düşünür ki, Suriyanın PKK qolu təmizlənmədikcə ölkənin unitarlığından, dövlətçiliyindən, gələcəyi və iqtisadi inkişafından danışmaq qeyri-mümkündür:
"Çünki həmin terror qrupunun nəzarəti altında olan ərazidə Suriyanın ciddi infrastrukturu - neft-qaz yataqları, mühüm kənd təsərrüfatı əraziləri yerləşir. Bu baxımdan, Suriya ordusu ilə PKK-nın buradakı qolu arasında münaqişə qaçılmazdır".
Həmsöhbətimiz hesab edir ki, hazırkı vəziyyətdə, mövcud reallıqlar çərçivəsində heç bir ölkə SDQ terror qruplaşmasını öz himayəsinə götürməyəcək:
"Bunu həmin terror qruplaşması da başa düşür. Bu baxımdan da SDQ öz legitimliyini qorumaq, varlıqlarını sübut etmək və Dəməşqin druzlara güzəştə gedəcəyi kimi kürdlərə münasibətdə də müəyyən güzəştlərə getməsi üçün təzyiq göstərir. Amma buna nail ola bilməyəcəklər. Çünki burada Türkiyə faktoru var. Böyük ehtimalla Suriyanın şimalından PKK-nın təmizlənməsi prosesində Türkiyə ordusu aktiv rol alacaq. Suriya ordusu da yetərincə təcrübəlidir”.
Qeyd edək ki, kürdlərin rəhbərlik etdiyi terrorçu Suriya Demokratik Qüvvələrinin (SDQ) bölmələri Suriya ordusunun Hələb vilayətinin şərqindəki mövqelərini artilleriya və pilotsuz təyyarələrdən atəşə tutub. Məlumatlara görə, hədəf alınan ərazi Fərat çayı sahilindəki Tişrin bəndi olub. SDQ isə iddia edir ki, hücum hökumət qüvvələrinin yerli sakinlərin evlərinə maddi ziyan vurduğu iddia edilən atəşə cavab olub. Suriya keçid hökumətinin Müdafiə Nazirliyi dəfələrlə kürdləri əldə edilmiş razılaşmaları yerinə yetirməyə, Hələb və ətrafını atəşə tutmağı dayandırmağa çağırıb.
SDF komandanlığı isə öz növbəsində hökumətyönlü qüvvələr tərkibində fəaliyyət göstərən "intizamsız qrupları” təxribatlarda ittiham edib. Onu da xatırladaq ki, bu ilin martında Suriyanın keçid prezidenti Əhməd əl-Şaraa və SDF komandiri Mazlum Abdi kürd döyüşçülərinin ilin sonuna qədər Suriyanın nizami ordusuna inteqrasiyası ilə bağlı saziş imzalayıblar.
Tərəflər Suriyanın şimal-şərqində yerləşən hava limanları, eləcə də qaz və neft yataqları da daxil olmaqla kürdlərin nəzarətində olan bütün mülki və hərbi obyektlərin Dəməşqdəki yeni administrasiyanın səlahiyyətinə veriləcəyi barədə razılığa gəliblər.