BAKI,AzerVoice, Fərid Mikayılov
Türkiyə Prezidenti Rəcəb Tayyib Ərdoğan Səudiyyə Ərəbistanına rəsmi səfərini başa çatdırdıqdan sonra Misirə yollanacaq.
AzerVoice xəbər verir ki, Ərdoğan Qahirədə Misir Ərəb Respublikasının Prezidenti Əbdülfəttah əs-Sisi ilə görüşəcək.
Bu, Ankara–Qahirə xətti üzrə liderlərin son dövrlərdə növbəti yüksək səviyyəli təması olacaq.
Qeyd edək ki, Prezident Ərdoğanın bu il ərzində ilk xarici səfəri Səudiyyə Ərəbistanına olub. O, Ər-Riyadda vəliəhd şahzadə Məhəmməd bin Salman ilə görüş keçirib. Səudiyyə Ərəbistanındakı təmaslardan sonra Türkiyə Prezidenti Misirin paytaxtı Qahirəyə yola düşəcək.
Ankara və Qahirə liderləri sonuncu dəfə oktyabr ayında keçirilən və mühüm razılaşmaların əldə olunduğu “Sülh naminə Şarm əl-Şeyx Zirvəsi” çərçivəsində görüşmüşdülər. Cari səfər bu təmasların davamı kimi qiymətləndirilir.
Ərdoğan bu həftə keçirilən Nazirlər Kabinetinin iclasında çıxışı zamanı bildirib ki, Misir səfəri çərçivəsində Qəzzada təhlükəsizlik və yenidənqurma məsələləri, regional sabitliyə təsir edən proseslər və İran ətrafında yaranmış gərginliyin artmasının qarşısının alınması yolları müzakirə olunacaq.
Görüşlərdə Qəzza zolağında mövcud humanitar vəziyyət, yardımın çatdırılması mexanizmləri və yenidənqurma prosesində mümkün birgə addımlar əsas gündəm mövzuları sırasında yer alacaq. Eyni zamanda Vaşinqton–Tehran xəttindəki gərginliyin azaldılması istiqamətində mümkün diplomatik təşəbbüslər də nəzərdən keçiriləcək.
Danışıqlarda Suriyadakı son vəziyyət, regional təhlükəsizlik çağırışları və Yaxın Şərqdə siyasi sabitlik məsələlərinin də ətraflı müzakirə ediləcəyi gözlənilir.
Prezident Ərdoğanın Misirə səfəri çərçivəsində Ankara–Qahirə iqtisadi əməkdaşlığının genişləndirilməsi də diqqət mərkəzində olacaq. Hazırda iki ölkə arasında ticarət dövriyyəsinin 15 milyard ABŞ dollarına çatdırılması hədəfi müəyyən edilib.
Bundan əlavə, Şərqi Aralıq dənizində karbohidrogen layihələri, kənd təsərrüfatı, turizm, müdafiə sənayesi və investisiya sahələrində əməkdaşlıq imkanları liderlərin sədrliyi ilə keçiriləcək Yüksək Səviyyəli Strateji Əməkdaşlıq Şurasının ikinci iclasında müzakirə olunacaq.
Səfər çərçivəsində Türkiyə və Misir iş adamları da Türkiyə–Misir Biznes Forumu çərçivəsində bir araya gələcək.