BAKI, AzerVoice, Orxan Qədirzadə
Türkiyənin dövlət rəmzi olan bayrağa qarşı həyata keçirilən hücum rəsmi Ankara tərəfindən açıq təxribat kimi qiymətləndirilib.
AzerVoice xəbər verir ki, Nusaybin–Qamışlı sərhəd xəttində, Suriya tərəfində terror təşkilatı YPG tərəfdarları tərəfindən Türk bayrağına qarşı hücum həyata keçirilib. Hadisə Türkiyənin terrorla mübarizə siyasətini hədəf alan açıq provokasiya kimi dəyərləndirilib.
Məlumata görə, PKK/YPG simpatizanlarından ibarət bir qrup Suriyadakı prosesləri bəhanə gətirərək Türkiyənin viza müraciət mərkəzinə hücum edib. Hücum zamanı bina daşlanıb, bəzi şəxslər binanın fasadına qalxaraq Türk bayrağına çatmağa və ona zərər verməyə cəhd göstərib.
Prezident Administrasiyasının Kommunikasiya İdarəsinin rəhbəri Burhanəddin Duran sosial şəbəkədə yaydığı açıqlamada bildirib ki, Türk bayrağına edilən bu hücum millətin huzuruna və dövlətin təhlükəsizliyinə yönəlmiş açıq təxribatdır. O vurğulayıb ki, Türkiyə Respublikasının təhlükəsizliyinə və müqəddəs dəyərlərinə qarşı yönələn heç bir hücum cavabsız qalmayacaq. Duran qeyd edib ki, hadisə ilə bağlı dərhal araşdırma başlanılıb və hücumun icraçıları, eləcə də arxasında duran strukturlar hüquq dövləti prinsipləri çərçivəsində məsuliyyətə cəlb olunacaq.
AK Partiyanın sədr müavini və partiya sözçüsü Ömer Çelik də hadisəyə sərt reaksiya verib. O bildirib ki, Türk bayrağına qarşı edilən hücum bütün milli dəyərlərə qarşı yönəlmiş alçaq təxribatdır və bu cür əməllərin mütləq cavabı veriləcək. Çelik vurğulayıb ki, bayraq millətin şərəf və birliyinin simvoludur və ona uzanan əllər bunun bədəlini ödəyəcək.
Rəsmi qurumlar hadisənin Türkiyənin “terrorsuz Türkiyə” hədəfini sabotaj etməyə yönəlmiş cəhd olduğunu bildirir və dövlətin bu kimi təxribatlara qarşı qətiyyətli mövqeyinin dəyişməz qalacağını vurğulayır.