BAKI, AzerVoice, Nailə Babazadə

Suriya Prezidenti Əhməd əş-Şəraa gələn həftənin çərşənbə akşamı rəsmi danışıqlar aparmaq üçün Berlinə yollanacaq.

AzerVoice xəbər verir ki, Almaniya Prezidentinin Ofisi suriyalı liderin həmkarı Frank-Valter Ştaynmaer ilə görüşəcəyini təsdiqləyib. Almaniya hökuməti bu səfər çərçivəsində suriyalı qaçqınların geri qaytarılması prosesini sürətləndirməyi planlaşdırır. Kansler Fridrix Mersin rəhbərlik etdiyi koalisiya hökuməti üçün bu məsələ hazırda əsas prioritetlərdən biri hesab olunur. Qeyd edək ki, Almaniyada təxminən bir milyona yaxın suriyalı qaçqın yaşayır və kansler Mers artıq mühacirlərin sığınacaq axtarması üçün heç bir səbəbin qalmadığını bəyan edib.

Səfər planı bəzi insan haqları qrupları və Almaniyadakı kürd icması tərəfindən etirazla qarşılanıb. Etirazçılar Suriyada sabitliyin hələ tam bərpa olunmadığını və etnik qruplar arasında qarşıdurmaların davam etdiyini bildirirlər. Bununla belə, Bəşər Əsəd rejiminin 2024-cü ilin sonunda devrilməsindən sonra Əhməd əş-Şəraa ABŞ və Fransa kimi ölkələrə də uğurlu səfərlər edib və ölkəsinə qarşı tətbiq edilən bir sıra beynəlxalq sanksiyaların ləğvinə nail olub.

Almaniya Xarici İşlər Nazirliyi ölkədəki infrastrukturun dağılması səbəbindən kütləvi qayıdış imkanlarının hələlik məhdud olduğunu desə də, hökumətdəki mühafizəkar cinah deportasiya prosesinin qətiyyətlə davam etdirilməsini tələb edir. Ötən ilin dekabrında Almaniya 2011-ci ildən bəri ilk dəfə cinayət törətmiş bir Suriya vətəndaşını Dəməşqə deportasiya edərək bu prosesə start verib.