BAKI, AzerVoice, Nailə Babazadə
Suriya sərhədi boyunca uzanan Karkamış–Nusaybin Dəmiryolu Xətti ilə Mardin–Şenyurt arasındakı 350 kilometrlik hissədə aparılan təmir və yaxşılaşdırma işləri sürətlə davam etdirilir.
AzerVoice xəbər verir ki, bu barədə Türkiyənin Nəqliyyat və İnfrastruktur naziri Abdulkadir Uraloğlu məlumat verib.
Nazirin sözlərinə görə, ümumi uzunluğu 350 kilometr olan xəttin 325 kilometri Karkamış–Nusaybin, 25 kilometri isə Mardin–Şenyurt istiqamətindən ibarətdir. O bildirib ki, bölgədə vəziyyətin normallaşması ilə sərhəd boyunca uzanan bu strateji xətt yenidən istifadəyə hazırlanır.
Nazir Uraloğlu qeyd edib ki, uzun illər aparıla bilməyən bütün texniki xidmət və təmir işləri geniş miqyasda həyata keçirilir.
“Xəttin əsas quruluşunun və üzərindəkı infrastrukturun təmiri, körpü və menfezlərin möhkəmləndirilməsi, həmçinin xətt boyunca ümumi yaxşılaşdırma işləri planlı şəkildə davam etdirilir.” - deyə o qeyd edib.
O bildirib ki, xətt və stansiya yolları yenidən qurulur, əsas infrastrukturda yaranmış zədələr aradan qaldırılır, üstyapı xüsusi dəmir yolu texnikası ilə yenilənir. Beton və taxta traverslər dəyişdirilir, balast çatışmazlıqları tamamlanır, menfezlər, körpülər və hemzemin keçidlər təmir edilir.
“Xətt üzərində yerləşən 5 körpünün təmiri və möhkəmləndirilməsi davam edir. 800 metr uzunluğundakı Karkamış körpüsündə də yeniləmə işləri aparılır və burada istifadə olunan 1 472 ədəd xüsusi istehsal traversin dəyişdirilməsi artıq başa çatdırılıb.” - deyə Uraloğlu qeyd edib.
Nazirlik layihəni 2025-ci ilin sonunda yekunlaşdırmağı planlaşdırır.
“Xətti 2026-cı ilin ilk rübündə yenidən istismara açmağı planlaşdırırıq.”- deyə Uraloğlu vurğulayıb.
Onun sözlərinə görə, xəttin yenidən fəaliyyətə başlaması yükdaşımaların həcmini artıracaq, bölgənin nəqliyyat əlaqələrini genişləndirəcək və regional inteqrasiyaya mühüm töhfə verəcək. Karkamış–Nusaybin və Mardin–Şenyurt xətləri, Bölgənin İnkişafı Layihəsi çərçivəsində inşa ediləcək Ovaköy–Nusaybin dəmir yolu ilə birlikdə beynəlxalq yükdaşımalarını gücləndirəcək.