BAKI, AzerVoice, Nailə Babazadə

Türkiyənin daxili işlər naziri Ali Yerlikaya, kibercinayətlərlə mübarizə çərçivəsində 59 vilayətdə 10 gündür davam edən əməliyyatlarda 539 şübhəlinin saxlanıldığını açıqlayıb.

AzerVoice xəbər verir ki, nazir Yerlikaya sosial media hesabında paylaşdığı açıqlamada, əməliyyatların Türkiyə Daxili İşlər Nazirliyinə bağlı Polis Baş İdarəsinin Kibercinayətlərlə Mübarizə İdarəsi və Mali Cinayətləri Araşdırma Şurası (MASAK) tərəfindən həyata keçirildiyini bildirib.

Yerlikaya qeyd edib ki, “onlayn uşaq müstehcənliyi və istismarı, qeyri-qanuni mərc oyunları və dələduzluq” cinayətlərinə qarşı keçirilən əməliyyatlarda 539 şübhəlidən 190 nəfər həbs edilib, 111 nəfərə isə məhkəmə nəzarəti tədbiri tətbiq olunub. Digər şübhəlilərlə bağlı hüquqi prosedurların davam etdiyi bildirilib.

Nazir vurğulayıb ki, Ankara, İzmir və İstanbul daxil olmaqla 59 vilayəti əhatə edən və 10 gündür davam edən əməliyyatlar, vətəndaşların maddi və mənəvi zərər görməsinin qarşısını almaq məqsədilə həyata keçirilib.

İstintaq zamanı müəyyən olunub ki, şübhəlilər uşaqlara aid müstehcən görüntüləri paylaşmaqla yanaşı, “məhsul satışı, kirayə bungalov, sığorta ödənişi, evdə iş elanları, sosial yardım bağışı” kimi mövzularla vətəndaşları aldatmağa çalışıblar.

Həmçinin, şübhəlilərin vətəndaşların mobil bank hesablarına daxil olaraq qanunsuz gəlir əldə etdikləri, qeyri-qanuni mərc və qumar oyunları təşkil etdikləri, POS cihazları vasitəsilə faizlə pul verdikləri və qeyri-qanuni pul köçürmələrinə vasitəçilik edib bunun reklamını etdikləri də müəyyən edilib.

Əməliyyatlar nəticəsində cinayət yolu ilə əldə olunduğu düşünülən təxminən 404 milyon lirə dəyərində 7 şirkət, 3 mənzil və 5 torpaq sahəsinə əl qoyulub.