BAKI, AzerVoice, Nailə Babazadə

Türkiyə Prezidenti Rəcəb Tayyib Ərdoğan, Kahramankazan rayonunda keçirilən BMC Ankara Tank və Yeni Nəsil Zirehli Texnika İstehsal Zavodunun açılışı və ilk ALTAY tanklarının təhvil verilməsi mərasimində çıxış edib.

AzerVoice xəbər verir ki, Prezident Ərdoğan çıxışında Türkiyənin müdafiə sənayesində qazandığı uğurların milli iradənin və mühəndislik gücünün nəticəsi olduğunu bildirib. O, ALTAY tankı layihəsinin Türkiyənin tam müstəqil müdafiə sənayesi hədəfinin simvoluna çevrildiyini vurğulayıb.

“Türk müdafiə sənayesinə, mühəndislərimizə və texniklərimizə olan etimadın qarşılığını bu zavod və ALTAY tankı ilə bir daha görürük,” – deyə Ərdoğan qeyd edib.

Ərdoğan, 840 min kvadratmetrlik ərazidə qurulan zavodda 1500-dən çox ixtisaslı mütəxəssisin çalışacağını, hər ay 8 ALTAY tankı və 10 ALTUĞ zirehli maşını istehsal ediləcəyini açıqlayıb. Prezident, məqsədlərinin kritik materiallarda xarici asılılığı tamamilə aradan qaldırmaq olduğunu söyləyib.

O, “Qarşıya çıxan maneələrin yalnız prosesi yavaşlada biləcəyini, lakin Türkiyənin hədəfinə çatmasına mane ola bilməyəcəyini” qeyd edib.

Prezident həmçinin qlobal miqyasda gedən siyasi və iqtisadi dəyişikliklərə diqqət çəkərək, beynəlxalq sistemin dərin böhran içində olduğunu bildirib.

“Artıq haqlı olmaq kifayət etmir, haqqını qorumaq üçün güclü olmalısan. Bunu Bosniyada, Suriyada və son olaraq Qəzzada gördük. 70 min günahsız insanın öldürüldüyü Qəzza soyqırımı bu reallığı bir daha ortaya qoydu.” - deyə Ərdoğan qeyd edib.

Ərdoğan çıxışını, Türkiyənin müdafiə sənayesində tam müstəqillik yolunda irəliləməyə davam edəcəyini və ALTAY tankının bu yolda yeni bir mərhələnin başlanğıcı olduğunu vurğulayaraq tamamlayıb.