BAKI, AzerVoice, Səməd Əyyubov – Türkiyə Prezidenti Rəcəb Tayyib Ərdoğan Böyük Britaniyanın Baş naziri Kir Starmerlə telefon danışığı aparıb.

AzerVoice xəbər verir ki, bu barədə Türkiyə Prezidenti Administrasiyasının İctimaiyyətlə Əlaqələr Departamenti məlumat yayıb.

Məlumata görə, söhbət zamanı iki ölkə arasında ikitərəfli münasibətlər, regional və qlobal məsələlər müzakirə edilib.

Ərdoğan, Qəzza zolağındakı humanitar vəziyyətin kritik həddə çatdığını, baş verənlərə yalnız reaksiya verməyin kifayət etmədiyini, bunun qarşısının alınması üçün addımlar atmağın bəşəriyyətin üzərinə düşən bir vəzifə olduğunu vurğulayıb.

O, Türkiyənin Qəzzaya davamlı humanitar yardım göndərdiyini, bölgədə atəşkəsin təmin edilməsi üçün vasitəçilərin səylərini və aparılan danışıqları dəstəklədiyini bildirib.

Ərdoğan, Starmeri İngiltərənin Fələstin dövlətini tanıması ilə bağlı bəyanatlarına görə təbrik edib.

Xatırladaq ki, Kir Starmer, İsrailin müəyyən şərtləri yerinə yetirməyəcəyi və Qəzzada atəşkəsi qəbul etməyəcəyi təqdirdə, ölkəsinin sentyabrda keçiriləcək BMT Baş Assambleyasında Fələstin dövlətini tanıyacağını bəyan etmişdi.