BAKI, AzerVoice, Zeynəb Raminqızı
2012-ci ildə Suriya vətəndaş müharibəsi səbəbilə dayandırılan Türk Hava Yollarının (THY) Hələb reysləri 13 illik fasilədən sonra yenidən fəaliyyətə başlayıb. İlk uçuş İstanbuldan 145 sərnişinlə həyata keçirilib.
AzerVoice xəbər verir ki, Türk Hava Yolları 13 illik fasilədən sonra Suriyanın Hələb şəhərinə müntəzəm reyslərini bərpa edib. 2012-ci ildə təhlükəsizlik səbəbilə dayandırılan uçuşlar iyulun 25-də İstanbul Hava Limanından yola düşən TK844 saylı reyslə yenidən başlayıb.
145 sərnişinlə saat 08:10-da havaya qalxan təyyarə 10:10-da Hələb Beynəlxalq Hava Limanına eniş edib.
Türkiyənin Hələbdəki baş konsulu Muammer Hakan Cengiz “Bu uçuş Hələbin Türkiyə və dünya ilə əlaqələrinin bərpasında mühüm rol oynayacaq. Hələbin minillik əlaqələri THY ilə səmadan yenidən qurulur.”- deyə qeyd edib.
Suriya Mülki Aviasiya İdarəsinin nümayəndəsi Alaa Əl Sallal da bu hadisəni ölkənin mülki aviasiya tarixinə yeni səhifə kimi dəyərləndirib.
Hələb, THY-nin Suriyadakı ikinci təyinat məntəqəsi olub. Yanvarda Dəməşqə başlayan reyslərdən sonra Hələb uçuşlarının əlavə olunması ilə Türk Hava Yolları Suriya üzrə istiqamətlərini artırır.
İlkin mərhələdə uçuşlar həftədə üç dəfə – çərşənbə, cümə və bazar günləri – həyata keçiriləcək. Avqustun 19-dan etibarən bu reyslərin sayı həftədə beşə, sentyabrın 1-dən isə gündəlik uçuşlara çatdırılacaq.
THY Hələb reysləri üçün bilet satışını 299 ABŞ dollarından başlayan qiymətlərlə elan edib. Bu qiymət yalnız rəsmi veb sayt üzərindən alınan biletlərə şamil olunur.
