BAKI, AzerVoice, Nailə Babazadə

TÜİB İdarə Heyətinin sədri Hüseyn Böyükfırat AzerVoice-ə müsahibəsində bildirib ki, Qarabağda aparılan genişmiqyaslı quruculuq işləri Türkiyə investorlarının bölgəyə marağını ciddi şəkildə artırıb. Onun sözlərinə görə, bölgə təkcə tikinti sahəsi ilə deyil, həm də turizm və kənd təsərrüfatı potensialı ilə diqqət mərkəzindədir.

“İlk mərhələ yol və infrastruktur idi. Bu proses davam etdikcə Qarabağ həm yaşayış, həm də biznes üçün əlverişli məkana çevrilir. Türkiyə iş adamlarının marağı da buna paralel olaraq yüksəlir,” – deyə TÜİB sədri bildirib.

Büyükfırat qeyd edib ki, Azərbaycan dövləti investorlar üçün geniş güzəştlər təqdim edir və Türkiyə şirkətlərinə də bu imkanlar ətraflı şəkildə izah olunur:

“Biz şirkətlərə deyirik ki, uzaq ölkələrə getməyin. Azərbaycan sizin üçün doğma bir bazardır. Xüsusilə tekstil, turizm və kənd təsərrüfatında böyük perspektiv var.”

O bildirib ki, həmçinin müdafiə sənayesində iki ölkə arasında genişmiqyaslı layihələr həyata keçirilir:

“ASELSAN, ROKETSAN və digər nəhəng şirkətlərlə ciddi ortaq layihələrimiz davam edir. Müdafiə sənayesi sahəsində əməkdaşlıq tarixdə ən yüksək səviyyəyə çatıb.”