BAKI, AzerVoice
Bu səhər saatlarında Çorumun Bahçelievler məhəlləsində yerləşən bazarda baş vermiş silahlı hücum nəticəsində biri ağır olmaqla 8 nəfər yaralanıb.
AzerVoice xəbər verir ki, hadisənin iki nəfər tərəfindən tapança və ov tüfəngi ilə törədildiyi bildirilir.
Hələlik şəxsiyyətləri müəyyən olunmayan iki nəfər bazara daxil olaraq ətrafa nəzarətsiz şəkildə atəş açıblar. Hücumdan sonra şübhəlilər hadisə yerindən qaçaraq izlərini itiriblər.
Silah səslərini eşidən sakinlər dərhal polis və təcili tibbi yardım xidmətlərinə məlumat veriblər. Hadisə yerinə gələn təcili yardım briqadaları yaralılara ilkin tibbi yardım göstərib və onları yaxınlıqdakı xəstəxanalara yerləşdiriblər. Yaralılardan birinin vəziyyətinin ağır olduğu bildirilir.
Çorum Şəhər Polis İdarəsi hadisə ilə bağlı genişmiqyaslı araşdırmalara başlayıb. Polis hadisə yerində texniki və kriminalistik baxış keçirir, təhlükəsizlik kameralarının görüntüləri vasitəsilə şübhəlilərin şəxsiyyətinin müəyyənləşdirilməsinə çalışır.
Hadisənin motivi barədə hələlik rəsmi açıqlama verilməyib.
