BAKI, AzerVoice, Nailə Babazadə
Türkiyə Prezidenti Rəcəb Tayyib Ərdoğan, CHP Başçısı Özgür Özelin çıxışlarına etiraz edərək, onun ifadələrini “siyasi üsluba yaraşmayan” adlandırıb.
AzerVoice xəbər verir ki, Ərdoğan Beştepe Millət Kitabxanasında keçirilən “Kitabxana 5.0 və İnsan Mərkəzli Rəqəmsal Dəyişiklik” Beynəlxalq Konfransında çıxış edib.
“Danışan şəxs Türkiyənin ikinci böyük partiyasının rəhbəridirmi, yoxsa tənzimləri pozulmuş bir təhqir avtomatıdır, təəssüf ki, bunu anlamaq çətindir. Türkiyə belə bir siyasi tərzi, belə kobudluğu əsla haqq etmir,” – deyə qeyd edib.
Prezident çıxışında elm, mədəniyyət və incəsənət nümayəndələrini salamlayaraq, konfransın kitabxana işi və rəqəmsal inkişaf baxımından ölkə üçün xeyirli nəticələr doğuracağına inandığını bildirib.
Ərdoğan həmçinin Türk kitabxanaçılığının inkişafında əməyi keçən elm adamlarına və sənətkarlarına təşəkkür edib.