BAKI, AzerVoice, Nailə Babazadə
ABŞ Prezidenti Donald Trampın İraq üzrə xüsusi nümayəndəsi Mark Savaya, Türkiyə ilə İraq arasında su idarəçiliyi və su sahəsində əməkdaşlıq layihələrinin maliyyələşdirilməsi üçün əldə edilən razılığı məmnunluqla qarşıladıqlarını bildirib.
AzerVoice xəbər verir ki, Savaya ABŞ mərkəzli X şirkətinin sosial media platformasında paylaşım edib.
“İraq ilə Türkiyə arasında davam edən su idarəçiliyi problemlərinin həllinə yönəlmiş razılığı yüksək qiymətləndirir və İraq hökumətini bu addımına görə təbrik edirəm.” - deyə paylaşımda qeyd edilir.
Razılığın iki ölkə münasibətlərinə töhfə verəcəyini vurğulayan Savaya, bunun bölgədə əməkdaşlığın gücləndirilməsi və milyonlarla İraq vətəndaşının həyatını təsir edən quraqlıq və su çatışmazlığına qarşı dayanıqlı resurs idarəçiliyinin təmin olunması baxımından mühüm addım olduğunu bildirib.
Savaya, ABŞ-ın bölgədə əməkdaşlıq təşəbbüslərini dəstəkləməyə davam edəcəyini əlavə edib.
Qeyd edək ki,İraqın paytaxtı Bağdadda 2 noyabr tarixində keçirilən “Türkiyə Respublikası Hökuməti ilə İraq Respublikası Hökuməti arasında su sahəsində əməkdaşlığa dair çərçivə razılığı üzrə layihələrin maliyyələşdirilməsi üçün mexanizm sənədinin imza mərasiminə İraq Baş naziri Məhəmməd Şia Əl-Sudani sədrlik etmişdi.
Razılığı İraq Xarici İşlər Naziri Fuad Hüseyn və Türkiyə Xarici İşlər Naziri Hakan Fidan imzalamışdı.