BAKI, AzerVoice, Nailə Babazadə

Türkiyənin daxili işlər naziri Ali Yerlikaya bildirib ki, daxili qoşunlar tərəfindən yeddi vilayətdə aparılan genişmiqyaslı əməliyyatlar nəticəsində səkkiz mütəşəkkil cinayət şəbəkəsi zərərsizləşdirilib, ümumilikdə 64 nəfər saxlanılıb.

AzerVoice xəbər verir ki, nazir sosial media hesabında paylaşdığı açıqlamada qeyd edib ki, bu əməliyyatların əsas məqsədi şəhərlərin təhlükəsizliyini və vətəndaşların rahatlığını təmin etməkdir.

Əməliyyatlar Baş Prokurorluqlar və Mütəşəkkil Cinayətkarlıqla Mübarizə Baş İdarəsinin koordinasiyasında həyata keçirilib. Saxlanılanlardan 36 nəfər barəsində həbs qətimkan tədbiri seçilib, 26 nəfər isə məhkəmə nəzarəti altında azadlığa buraxılıb. Digər şübhəlilərlə bağlı istintaq davam edir.

Araşdırmalar nəticəsində müəyyən olunub ki, saxlanılan şəxslər müxtəlif bölgələrdə bir sıra qanunsuz fəaliyyətlə məşğul olublar. Belə ki, Aydın vilayətində ev və avtomobillərin atəşə tutulması, Balıkesirdə qumar oynayan şəxslərə borc verərək məcburi sened imzalatmaq və şantaj etmək, Diyarbəkirdə yanacaq dələduzluğu, Orduda qarşılıqsız çeklə vətəndaşları aldatmaq, Kilisdə silah qaçaqmalçılığı, Şanlıurfada özlərini dövlət məmuru kimi təqdim edərək dələduzluq etmək, Niğdədə isə yüksək faizlə borc verib sələmçiliklə məşğul olmaq halları aşkarlanıb.

Ali Yerlikaya bildirib ki, bu əməliyyatlar nəticəsində dələduzluq, təhdid, sələmçilik və silah qaçaqmalçılığı kimi cinayətlərin qarşısı alınıb.

Prokurorluq orqanları tərəfindən saxlanılan şəxslərlə bağlı istintaq başladılıb. Nazir əməliyyatlarda iştirak edən hüquq-mühafizə əməkdaşlarını təbrik edib və cinayətkarlığa qarşı mübarizənin qətiyyətlə davam etdiriləcəyini qeyd edib.