BAKI, AzerVoice
Türkiyənin ədliyyə naziri Yılmaz Tunç PKK terror təşkilatının silah buraxması ilə bağlı prosesə münasibət bildirib.
AzerVoice xəbər verir ki, nazir Tunç bu fikirləri Qaziantepin Məhkəmə-Tibbi Ekspertiza Qrup Başqanlığı binasının təməlqoyma mərasimində səsləndirib.
O, “Terrorun sona çatdığı, artıq Türkiyədə uşaqlarımızın, qadınlarımızın, gənclərimizin və ümumiyyətlə övladlarımızın gələcəyə inamla baxdığı bir ölkə olacaq. Bundan əsla şübhəniz olmasın,” – deyə vurğulayıb.
Tunç, son 23 ildə bölgə ayırımı edilmədən həyata keçirilən infrastruktur və üstyapı layihələrinin “Terrorsuz Türkiyə” üçün möhkəm bir zəmin yaratdığını qeyd edib.
Nazir bildirib ki, bu prosesin uğurla başa çatacağına əminlik var: “İnşallah bu proses uğurla tamamlanacaq və Türkiyə terrorlardan təmizlənmiş, iqtisadi gücünü daha da artırmış bir şəkildə dünyanın ən güclü dövlətləri sırasına sürətlə daxil olacaq. O zaman dünyada ədaləti, haqqı, Fələstinin və Qəzzanın hüquqlarını daha güclü şəkildə müdafiə edə biləcəyik. Bundan əsla şübhəniz olmasın.”
Qeyd edək ki, iyulun 11-də İraqın Süleymaniyyə şəhərində PKK-ya bağlı bir qrup silahlarını məhv edərək prosesin yeni mərhələsini başladıb.
PKK üzvləri Süleymaniyyənin Surdaş mahalı sərhədindəki mağarada toplaşaraq silahlarını alovlu qazanda məhv ediblər. Proses İraq Kürd Regional Rəhbərliyi, Türkiyənin Milli Kəşfiyyat Təşkilatı, DEM Partiyası nümayəndələri və vətəndaş cəmiyyəti təmsilçilərinin iştirakı ilə izlənilib.
MHP sədri Devlet Bahçelinin çağırışı və Prezident Rəcəb Tayyib Ərdoğanın dəstəyi ilə irəliləyən "Terrorsuz Türkiyə" prosesi, silahların məhv edilməsi ilə simvolik dönüş nöqtəsinə çatıb. PKK-nın tam tərksilahı sentyabrın sonuna qədər tamamlanması planlaşdırılır.
Həmçinin qeyd edək ki, bu prosesin əsas mərhələlərinə DEM Partiyasının Ədliyyə Nazirliyinin icazəsi ilə İmralıya səfərləri, siyasi partiyalar arasında müzakirələr və prezident Ərdoğanın Pervin Buldan və Mithat Sancarla görüşləri daxildir. PKK mayın 5-7-də keçirilən qurultayında təşkilatın ləğvi və silahın yerə qoyulması qərarını açıqlamışdı.
"Terrordan Azad Türkiyə" hədəfinin həyata keçməsi ilə ölkə əhalisi üçün yeni bir dövr başlayır. Hökumət, prosesi sülh və təhlükəsizlik çərçivəsində davam etdirməkdə qərarlıdır.
