BAKI, AzerVoice, Nailə Babazadə

Türkiyənin milli müdafiə naziri Yaşar Güler bəyan edib ki, PKK və onun müxtəlif adlar altında fəaliyyət göstərən bütün qolları həm ölkə daxilində, həm də sərhədlər xaricində terror fəaliyyətlərinə dərhal son qoymalı və silahlarını şərtsiz şəkildə təhvil verməlidir.

AzerVoice xəbər verir ki, Güler bu fikirləri Konya Sənaye Palatası tərəfindən keçirilən 8-ci Müdafiə Sənayesi Təchizatçıları Görüşünün açılışında səsləndirib. O, ASELSAN-ın əsas sponsorluğu ilə keçirilən tədbirin müdafiə sənayesi üçün mühüm platforma yaratdığını vurğulayıb.

Nazir bildirib ki, terror təşkilatının 26 oktyabrda Türkiyədən çəkilmə qərarı “prosesi sürətləndirən əhəmiyyətli addımdır”, lakin bu, silahların təslim edilməsini zəruri edən məsuliyyəti aradan qaldırmır.

Nazir qeyd edib ki, Prezident Rəcəb Tayyib Ərdoğanın liderliyi altında həyata keçirilən sənayeləşmə və müdafiə layihələri Türkiyəni xarici asılılıqdan qurtarıb.

“Bu gün Türkiyə müdafiə sənayesi quru, dəniz, hava və kiberməkanda inkişaf etdirdiyi sistemlərlə dünyada söz sahibi bir mövqedədir.” - deyə Gülər qeyd edib.