BAKI, AzerVoice – Türkiyə Prezidenti Rəcəb Tayyib Ərdoğan Lozanna müqaviləsinin imzalanmasının 102-ci ildönümü münasibətilə verdiyi bəyanatda ölkənin inkişaf yolunda qətiyyətlə irəlilədiyini vurğulayıb.
Ərdoğan qeyd edib ki, bu gün Türkiyə hər sahədə dünənkindən daha yaxşı vəziyyətdədir və "Türk Əsri" vizyonunu rəhbər tutaraq inkişafını davam etdirir. Prezident bildirib ki, Lozannadan 102 il sonra da Türkiyə qlobal nüfuza malik bir gücə çevrilmək yolunda möhkəm addımlar atır.
"Biz sülhə, əməkdaşlığa və qarşılıqlı hörmətə əsaslanan xarici siyasətimizlə regionumuzda və dünyada nüfuzlu gücə çevrilmək yolunda irəliləyirik", – deyə dövlət başçısı vurğulayıb.
Ərdoğan, həmçinin, Lozanna müqaviləsinin ildönümündə Cümhuriyyətin banisi Qazi Mustafa Kamal Atatürkü, Qurtuluş Savaşı qəhrəmanlarını və şəhidləri ehtiramla yad etdiyini bildirib.