BAKI,AzerVoice, Fərid Mikayılov

Səudiyyə Ərəbistanında keçirilən “Gulf Shield Exercise 2026” adlı birgə hərbi təlim cümə günü yekunlaşıb.

AzerVoice xəbər verir ki, Səudiyyə Ərəbistanı Mətbuat Agentliyinin (SPA) məlumatına görə, təlimdə Körfəz Əməkdaşlıq Şurasına üzv ölkələrin hava qüvvələri və hava hücumundan müdafiə qüvvələri, eləcə də şuranln Birləşmiş Hərbi Komandanlığı iştirak edib.

Bildirilib ki, təlim regionda müdafiə sahəsində əməkdaşlığın gücləndirilməsi və döyüş hazırlığının artırılması məqsədilə həyata keçirilib. Manevrlər çərçivəsində çoxölçülü hava və raket təhdidlərinin simulyasiyası, birgə hava əməliyyatları və inteqrasiya olunmuş sahə təlimləri icra edilib.

Təlimlər zamanı əməliyyat inteqrasiyasının dərinləşdirilməsi, komanda-idarəetmə sistemlərinin gücləndirilməsi və birgə əməliyyat mühitində effektivliyin artırılması əsas prioritetlər olub. Eyni zamanda, mövcud, yaranan və gələcək təhdidlərə qarşı keyfiyyətli hərbi imkanların inkişaf etdirilməsi, kollektiv müdafiə və çevik çəkindirmə konsepsiyalarının möhkəmləndirilməsi hədəflənib.

“Gulf Shield Exercise 2026” körfəz ölkələri arasında hərbi əməkdaşlığın əsas sütunlarından biri hesab olunur və müdafiə inteqrasiyasının artırılması, regional və beynəlxalq çağırışlara cavabvermə qabiliyyətinin gücləndirilməsi istiqamətində davam edən səyləri əks etdirir.

Təlimin sonunda iştirakçı qüvvələr yüksək səviyyəli uzlaşma və əməliyyat inteqrasiyasını nümayiş etdirən birgə hava nümayişi keçiriblər. Bu nümayiş vahid əməliyyat konsepsiyaları və qabaqcıl peşəkar standartlara uyğun planlaşdırma və icra bacarıqlarını ortaya qoyub.