BAKI,
AzerVoice
Əminə Ərdoğan Vatikan səfərində Papa XIV Leo ilə Qəzza, iqlim və
ailə dəyərlərini müzakirə edib
AzerVoice xəbər verir ki, Türkiyə Prezidenti Rəcəb Tayyib Ərdoğanın həyat yoldaşı Əminə Ərdoğan Vatikanda Papa Sosial Elmlər İnstitutunda keçirilən “Qardaşlığa əsaslanan iqtisadiyyat: Etik çoxtərəflilik” tədbiri çərçivəsində katoliklərin ruhani lideri və Vatikanın dövlət başçısı Papa XIV Leo ilə görüşüb.
Vatikan Apostol Sarayında baş tutan görüşdə Qəzzada baş verən humanitar faciə, iqlim dəyişikliyi ilə mübarizə, islamofobiya, irqçilik və ailə institutunun cəmiyyətdəki rolu kimi mövzular müzakirə olunub.
Əminə Ərdoğan Papa XIV Leo-nu yeni vəzifəyə seçilməsi münasibətilə təbrik edib və onun missiyasının xristian dünyası üçün faydalı olmasını arzulayıb. Qəzza mövzusunda danışan Ərdoğan, bölgədə daimi atəşkəsin təmin edilməsinin və humanitar yardımın çatdırılmasının vacibliyini vurğulayaraq, xristian dünyasının bu məsələdə daha güclü mövqe sərgiləməsinin əhəmiyyətini bildirib. O, iki dövlətli həllin reallaşmasının vacibliyini və Fələstin Dövlətini tanıyan ölkələrin sayının artırılmasının gərəkdiyini də qeyd edib.
Papa XIV Leo isə Vatikanın Yaxın Şərqdə həllin bir hissəsi olma prinsipinə sadiq olduğunu və iki dövlətli sülh planını dəstəklədiklərini bildirib. O, Türkiyənin regionda sülh və sabitlik baxımından mühüm səs olduğunu vurğulayıb və ilk xarici səfərlərindən birini Türkiyəyə etməyi planlaşdırdıqlarını açıqlayıb.
İqlim dəyişikliyi ilə bağlı Ərdoğan “Sıfır Tullantı” hərəkatı barədə məlumat verərək, Papa XIV Leo-nu bu təşəbbüsə dəstək verməyə çağırıb. Papa isə iqlim böhranı ilə bağlı birgə işləmək yollarını axtarmağa hazır olduqlarını deyib.
Görüşdə islamofobiya və irqçilik meyllərinə qarşı ortaq mövqe sərgiləməyin vacibliyi, ailənin sosial nizam və fərdi rifahda rolu da geniş müzakirə olunub. Əminə Ərdoğan bildirib ki, Türkiyə bu sahələrdə çoxmillətli və fərqli inanc icmalarının birgə yaşadığı örnək bir ölkədir və azlıqların hüquqlarının qorunması üçün qanunvericilikdə mühüm addımlar atılıb.
Görüşlə bağlı sosial media hesabında paylaşım edən Əminə Ərdoğan , “Qəzzada humanitar faciənin dayandırılması və sülhün bərqərar olunması üçün Vatikanın və xristian dünyasının daha qətiyyətli addımlar atacağına inanıram”- deyə qeyd edib.