BAKI, AzerVoice, Orxan Qədirzadə
Səudiyyə Ərəbistanı 2026-cı ilin 22–23 aprel tarixlərində Dünya İqtisadi Forumunun “Qlobal Əməkdaşlıq və Artım” mövzusunda yüksək səviyyəli beynəlxalq toplantısına ev sahibliyi edəcək.
AzerVoice xəbər verir ki, “Ortaq zəminin qurulması və artımın canlandırılması” şüarı ilə keçiriləcək toplantı Ciddə şəhərində baş tutacaq. Bu barədə qərar İsveçrənin Davos şəhərində keçirilən Dünya İqtisadi Forumunun 56-cı illik toplantısının bağlanış günündə açıqlanıb.
Səudiyyə Ərəbistanının iqtisadiyyat və planlaşdırma naziri Faysal Əlibrahim bildirib ki, 2026-cı ildə keçiriləcək görüş 2025-ci il üzrə WEF illik toplantısında elan edilmiş daimi yüksək səviyyəli formatın tərkib hissəsidir. Nazir çıxışında qlobal iqtisadi artımın sürətləndirilməsi üçün davamlı dialoqun vacibliyini vurğulayaraq, beynəlxalq liderləri Ciddədə keçiriləcək toplantıda fəal iştiraka çağırıb.
Əlibrahim qeyd edib ki, bu görüş 2024-cü ildə Ər-Riyadda təşkil olunmuş Dünya İqtisadi Forumunun xüsusi iclasında formalaşan müsbət dinamikanın davamı olacaq. Onun sözlərinə görə, Səudiyyə Ərəbistanı artıq qlobal miqyasda praqmatik yanaşmaların və nəticəyönümlü qərarların mərkəzi kimi mövqeyini möhkəmləndirib.
Dünya İqtisadi Forumunun prezidenti Börqe Brende isə Forumun Səudiyyə Ərəbistanı ilə əməkdaşlığının dərinləşdiyini vurğulayıb. O bildirib ki, 2026-cı ildə Krallığa yenidən qayıdaraq Davosda başlayan müzakirələri davam etdirmək, liderlər arasında etimadın gücləndirilməsi və dialoqun real əməkdaşlıq və konkret addımlarla nəticələnməsi üçün əlverişli mühit yaradılacaq.
Qeyd olunur ki, Səudiyyə Ərəbistanının bu mühüm beynəlxalq toplantıya ev sahibliyi etməsi 2024-cü ilin aprelində Ər-Riyadda keçirilmiş xüsusi WEF görüşünün uğurlu nəticələrinin davamıdır və Krallığın inkişaf etmiş və inkişaf etməkdə olan ölkələr arasında iqtisadi sabitliyin təşviqi və qlobal çağırışlara birgə cavab verilməsi istiqamətində etibarlı tərəfdaş kimi rolunu daha da gücləndirir.