BAKI, AzerVoice

İstanbul Baş Prokurorluğu, Leman jurnalında Həzrəti Məhəmmədin karikaturasının dərc edilməsi ilə əlaqədar həmin nəşrlə bağlı olan şirkət və şəxslər barəsində maliyyə cinayətləri üzrə istintaq başladıldığını açıqlayıb.

Baş Prokurorluğun yaydığı bəyanatda, Leman jurnalının 26 iyun tarixli sayında Həzrəti Məhəmməd və Həzrəti Musanın karikatura formasında təsvir olunmuş vizual görüntülərinin yer aldığı rəsmin “xalqı kin və düşmənçiliyə təhrik və ya alçaltma” cinayətinə əsas verə biləcəyi qeyd olunub.

Bu səbəbdən Türkiyə Cinayət Məcəlləsinin 216-cı maddəsinin birinci bəndinə əsasən rəsmi istintaq başladıldığı bildirilib.

Açıqlamada əlavə olunub:

“İstintaq çərçivəsində, şübhəlilər Ali Yavuz, Aslan Özdemir, Cəbrayıl Okçu, Doğan Pəhləvan, Mehmet Tunçay Akgün, Zafer Aknar ilə LM Basın Yayın Limited Şirkəti və onun səlahiyyətli nümayəndəsi Mehmet Çağçağ, eləcə də əlaqəli olduğu qiymətləndirilən LMK Entertainment Company (Leman Kültür) və onun yetkilisi Kemal Şentürk barəsində, bu təhqiramiz hərəkətin həyata keçirilməsi üçün daxili və ya xarici maliyyə dəstəyi alıb-almadıqlarının müəyyənləşdirilməsi və əldə ediləcək nəticələrin istintaqa yön verməsi üçün maliyyə istintaqı aparılır.”

İstanbul Baş Prokurorluğunun Həzrəti Məhəmmədə qarşı karikatura dərc olunması ilə bağlı “dini dəyərləri açıq-aşkar təhqir etmək” ittihamı ilə başladığı istintaq çərçivəsində saxlanılan dörd şübhəlinin polis idarəsindəki prosedurları yekunlaşıb.

İstintaq çərçivəsində, adıçəkilən jurnalın həmin sayı üçün toplatma qərarı verilib. Bununla yanaşı, jurnalın sosial media hesablarına girişi məhdudlaşdırmaq üçün də hüquqi prosedurlar başladılıb.