BAKI, AzerVoice

Peyğəmbərimizə qarşı təhqiri şiddətlə qınayıram.

AzerVoice xəbər verir ki, Türkiyə Böyük Millət Məclisinin (TBMM) sədri Numan Kurtulmuş “Leman” jurnalında yayımlanan və İslam Peyğəmbərinə qarşı təhqir xarakteri daşıyan karikaturaya sərt reaksiya verib.

TBMM rəhbəri məsələ ilə bağlı çıxışında bu cür hərəkətlərin azad söz və ifadə sərbəstliyi adı altında qəbul edilə bilməyəcəyini bildirib.

“Peyğəmbərimizin adını çəkərkən əlimizi sinəmizə qoyub ehtiram göstəririk. Onun həyatımızdakı yeri yalnız dini deyil, eyni zamanda əxlaqi və insani bələdçidir. Bu cür təhqiramiz yanaşmalar təkcə müsəlmanlara deyil, bütün insanlığa qarşı hücumdur”- deyə o qeyd edib.

O, karikaturanı hazırlayanları və arxasında duranlarıpisləyərək, bunun “heç vaxt dözülməz bir təcavüz” olduğunu vurğulayıb. Kurtulmuş əlavə edib ki, bu cür hücumlar qlobal miqyasda İslamofobiyanı və dini nifrəti alovlandırmaq məqsədi daşıyır.

Qeyd edək ki, “Leman” adlı jurnalın son sayında yayımlanan karikatura Türkiyə daxilində və İslam aləmində geniş qınağa səbəb olub. Rəsmi şəxslər və ictimaiyyət nümayəndələri bu cür yanaşmanın provokativ xarakter daşıdığını bildirərək məsələ ilə bağlı hüquqi addımların atılmalı olduğunu vurğulayırlar.