BAKI, AzerVoice
Türkiyədə süni intellekt texnologiyasından istifadə edərək məşhur şəxslərin adından saxta investisiya çağırışları edən dələduz şəbəkələr bu dəfə Türkiyənin 11-ci prezidenti Abdullah Gülün qəzəbinə səbəb olub. AzerVoice xəbər verir ki, onun görüntüsünü və səsini təqlid edən videolar sosial şəbəkələrdə yayılmağa başlayıb və Gül məsələ ilə bağlı prokurorluğa və kibercinayətkarlıqla mübarizə orqanlarına rəsmi şikayət ünvanlayıb.
Bu fırıldaqçılar daha əvvəl də tanınmış simalar – Baykar şirkətinin rəhbəri Selçuk Bayraktar və iş adamı Gülər Sabancının adından istifadə edərək minlərlə insanı aldatmışdılar. Onlar “investisiya fürsəti” adı altında ictimai nüfuzdan yararlanaraq milyonlarla dollar dəyərində dələduzluq həyata keçiriblər.
“Son vaxtlar süni intellektlə hazırlanan və mənim adıma yayılan fırıldaq xarakterli videolar təəssüf ki, internetdə dövr edir. Bu videolarla bağlı artıq prokurorluğa və kibercinayətkarlıqla mübarizə orqanlarına müraciət olunub. Bu tip paylaşımların davam etməsi səbəbindən bütün vətəndaşlarımızı bu saxtakarlıqlara qarşı diqqətli olmağa çağırıram.”- Abdullah Gül bu məsələ ilə bağlı sosial şəbəkədə paylaşım edərək bildirib:
Sosial media vasitəsilə yayılan süni intellekt fırıldaqları
Bu dələduz şəbəkələr süni intellekt texnologiyası ilə məşhur siyasətçilərin, idmançıların və jurnalistlərin səsini və görüntüsünü saxtalaşdıraraq, “sponsorlu reklam” adı altında sosial şəbəkələrdə milyonlarla istifadəçiyə çatırlar. İnsanlara məşhurların tövsiyə etdiyi guya qazanc vəd edən investisiya platformaları təqdim olunur, nəticədə isə fırıldaqçılar böyük məbləğlər əldə edirlər.
Abdullah Gülün hüquqi addımı bu cür dələduzluq fəaliyyətlərinə qarşı ciddi tədbirlərin başlanmasına təkan verə bilər. Kibertəhlükəsizlik üzrə ekspertlər isə vətəndaşlara sosial şəbəkələrdə yayılan bu cür tanımadıqları maliyyə çağırışlarına qarşı həssas və ehtiyatlı davranmağı tövsiyə edirlər.
