BAKI, AzerVoice, Orxan Qədirzadə

Həsəkə vilayətində Suriya ordusuna məxsus obyektə pilotsuz uçuş aparatı ilə endirilən zərbə nəticəsində yeddi hərbçi ölüb, daha 20 nəfər yaralanıb.

AzerVoice xəbər verir ki, hadisə ilə bağlı məlumatı Suriya Müdafiə Nazirliyi yayıb.

Nazirliyin açıqlamasına görə, ordu bölmələri Əl-Yarubiyyə sərhəd keçidi ərazisində partlayıcı qurğuların və pilotsuz aparat sursatlarının hazırlandığı emalatxananı aşkar edib. Ərazidə təhlükəsizlik tədbirləri görülən zaman YPG qruplaşması kamikadze pilotsuz aparatı ilə hücum həyata keçirib.

Müdafiə Nazirliyi bildirib ki, obyekt ərazisində YPG tərəfindən istifadəyə hazırlanmış bir neçə pilotsuz aparat mövcud olub. Ordunun operativ komandanlığı baş verənləri “təhlükəli eskalasiya” və “atəşkəs rejiminin açıq şəkildə pozulması” kimi qiymətləndirərək, razılaşmaların görməzdən gəlinərək hücumların davam etdirildiyini vurğulayıb.

Hücumdan bir gün əvvəl Suriya prezidentliyi Həsəkə vilayətinin gələcəyi ilə bağlı YPG ilə müəyyən qarşılıqlı anlaşmanın əldə edildiyini açıqlamışdı. Eyni zamanda Müdafiə Nazirliyi YPG ilə dörd günlük atəşkəs elan edildiyini bildirmişdi.

Qeyd edək ki, YPG Türkiyə, ABŞ, Böyük Britaniya və Avropa İttifaqı tərəfindən terror təşkilatı kimi tanınan PKK-nın Suriya qolu hesab olunur.