BAKI, AzerVoice, Orxan Qədirzadə
Suriya hökumət qüvvələri Həsəkə vilayətində yerləşən və İŞİD-lə əlaqəli minlərlə şəxsin saxlanıldığı Əl-Hol düşərgəsinə daxil olub.
AzerVoice xəbər verir ki, uzun illər ərzində düşərgəyə nəzarət edən kürd silahlı qüvvələrinin ərazidən geri çəkilməsindən sonra zirehli texnika ilə müşayiət olunan Suriya ordusu düşərgədə mövqe tutub.
Düşərgənin nəzarətinin dinc yolla hökumət qüvvələrinə ötürülməsi Dəməşq ilə kürdlərin rəhbərlik etdiyi Suriya Demokratik Qüvvələri arasında elan edilmiş dörd günlük atəşkəsin problemsiz icra olunduğunu göstərir. Nəzarətin ötürülməsi Suriya ordusu ilə SDQ arasında iki həftə davam edən və çərşənbə axşamı əldə olunan razılaşma ilə dayandırılan toqquşmalardan sonra baş verib.
Məlumata görə, əsasən qadınlar və uşaqlar olmaqla təxminən 24 min nəfərin saxlanıldığı Əl-Hol düşərgəsi İŞİD-lə əlaqəli şəxslərin yerləşdirildiyi ən böyük obyekt hesab olunur. Döyüşlər nəticəsində ABŞ-ın rəhbərlik etdiyi beynəlxalq koalisiya ilə birlikdə İŞİD-in məğlub edilməsində mühüm rol oynamış SDQ Şimali və Şərqi Suriyanın geniş ərazilərinə nəzarəti itirib.
Qeyd edək ki, kürd qüvvələri bu əraziləri Suriyada vətəndaş müharibəsinin davam etdiyi dövrdə nəzarətdə saxlayırdı. Münaqişə 2024-cü ilin dekabrında keçmiş prezident Bəşşar Əsəd rejiminin devrilməsi ilə başa çatıb. Hazırda Dəməşqdə hakimiyyətdə olan Prezident Əhməd əş-Şaraa administrasiyası ABŞ üçün İŞİD-lə mübarizədə əsas tərəfdaşa çevrilir və kürd silahlı birləşmələrinin Suriya dövlət strukturlarına inteqrasiyasını tələb edir.
ABŞ-ın Suriya üzrə xüsusi nümayəndəsi Tom Barak bildirib ki, SDQ-nin əsas anti-İŞİD qüvvəsi kimi rolu böyük ölçüdə başa çatıb və Dəməşq hökuməti təhlükəsizlik məsuliyyətini üzərinə götürməyə həm hazır, həm də qadirdir. Daha əvvəl Prezident əş-Şaraa ilə SDQ rəhbəri Məzlum Abdi İŞİD məhbuslarına nəzarətin Suriya dövlətinə verilməsi barədə razılığa gəlib.
Ən böyük İŞİD düşərgəsi
Əl-Hol düşərgəsində təxminən 14 min 500 suriyalı və 3 minə yaxın iraqlı saxlanılır. Bundan əlavə, dünyanın müxtəlif ölkələrindən İŞİD-ə qoşulmuş və təşkilata üzv olmuş 6 min 500 nəfər ayrıca yüksək mühafizəli bölmədə yerləşdirilib.
Məlumatlara əsasən, SDQ hələ də İŞİD üzvlərinin saxlanıldığı ondan çox həbsxananın əksəriyyətinə nəzarət edir. Onların arasında Həsəkə şəhərində yerləşən və 4 min 500 nəfərin saxlanıldığı Qveyiran həbsxanası ən böyük obyekt sayılır və tam şəkildə SDQ-nin nəzarətində qalır.
Bu arada, Suriya Daxili İşlər Nazirliyi Həsəkə vilayətindəki Şəddadi həbsxanasından 120 İŞİD üzvünün qaçdığını açıqlayıb. Ordu bu hadisədə SDQ-ni ittiham edib, kürd tərəfi isə obyektin Dəməşq qüvvələrinin hücumu nəticəsində nəzarətdən çıxdığını bildirib. Sonradan qaçan məhbusların bir hissəsinin hökumət qüvvələri tərəfindən yenidən saxlanıldığı qeyd olun