BAKI, AzerVoice, Nailə Babazadə
Cənubi Koreya və Birləşmiş Ərəb Əmirlikləri (BƏƏ) süni intellekt, nüvə enerjisi, hava nəqliyyatı və digər sahələrdə əməkdaşlığı genişləndirmək məqsədilə 7 memorandum imzalayıblar.
AzerVoice xəbər verir ki, Cənubi Koreya Prezidenti Li Çje Myon və BƏƏ Prezidenti Məhəmməd bin Zayed Əl Nahyan Abu Dabidə görüşüblər.
Li Çje Myon BƏƏ-ni “qardaş ölkə” adlandıraraq, ölkəsinin BƏƏ ilə “əsrlik dostluq qurmaq üçün geniş əməkdaşlığa hazır olduğunu” bildirib.
BƏƏ Prezidenti Məhəmməd bin Zayed Əl Nahyan isə Li-nin iyunda vəzifəyə gəlməsindən sonra Yaxın Şərqdə ilk səfərini BƏƏ-yə etməsini məmnunluqla qarşıladığını qeyd edib və süni intellekt, hava nəqliyyatı, elm və texnologiya sahələrində əməkdaşlığın genişləndirilməsini arzuladığını bildirib.
Görüş zamanı iki ölkə arasında süni intellekt, nüvə enerjisi, hava nəqliyyatı və səhiyyə sahələrində ikitərəfli əməkdaşlığı gücləndirmək məqsədilə 7 memorandum imzalanıb.