BAKI,
AzerVoice
KAAN döyüş təyyarəsi üzrə tarixi razılaşma - Türkiyə İndoneziyaya
48 təyyarə satacaq.
AzerVoice xəbər verir ki,
İndoneziyanın Ankaradakı səfiri Əhməd Rizal Purnama bu barədə
açıqlama verib.
Purnama razılaşmanı sadəcə bir alqı-satqı əməliyyatı deyil, iki dost və qardaş ölkə arasında müdafiə sahəsində dərin əməkdaşlığın başlanğıcı kimi qiymətləndirib.
“Bu, təkcə Türkiyənin tarixində ən böyük müdafiə ixracatı deyil, həm də İndoneziya üçün mühüm strateji seçimdir. Biz KAAN-ı yalnız bir təyyarə olaraq deyil, həm də ortaq istehsal və texnoloji tərəfdaşlıq üçün bir fürsət kimi görürük.” - deyə o qeyd edib.
Səfirin sözlərinə görə, İndoneziya bu müqavilə ilə həm KAAN təyyarələrinə, həm də Türkiyənin müdafiə sənayesindəki təcrübəsinə güvəndiyini ortaya qoyur.
“TUSAŞ, ASELSAN, ROKETSAN kimi şirkətlər artıq dünya səviyyəsində tanınır. Bu əməkdaşlıq müdafiə sənayesindəki gücümüzü birləşdirmək və ortaq layihələr həyata keçirmək üçün əhəmiyyətli fürsətdir.”- deyə o bildirib.
Qeyd edək ki, Türkiyənin beşinci nəsil döyüş təyyarəsi olan KAAN, yüksək manevr qabiliyyəti, radara qarşı az görünürlük və milli avionika sistemləri ilə diqqət çəkir. Müqavilə başa çatdıqdan sonra bu, Türkiyə tarixində ən böyük müdafiə ixracatı olacaq.
