BAKI, AzerVoice, Orxan Qədirzadə
Tacikistan hakimiyyəti Moskva yaxınlığında 10 yaşlı tacik məktəblinin bıçaqlanaraq öldürülməsini “etnik nifrət zəminində törədilmiş hücum” kimi dəyərləndirib və hadisə ilə bağlı Rusiyanın Tacikistandakı səfirini Xarici İşlər Nazirliyinə çağırıb.
AzerVoice xəbər verir ki, Tacikistan Xarici İşlər Nazirliyinin yaydığı bəyanata görə, hücum etnik motivlərlə törədilib və Rusiya tərəfinə “hadisə ilə bağlı dərhal obyektiv və qərəzsiz istintaq aparılması” tələbi ilə nota təqdim olunub.
Hadisə Moskvanın Odintsovo rayonuna bağlı Qorki-2 qəsəbəsində baş verib. Rusiya İstintaq Komitəsinin məlumatına əsasən, 15 yaşlı şübhəli saxlanılıb və hazırda istintaq təcridxanasındadır.
Tacikistan Daxili İşlər Nazirliyi isə ayrıca açıqlamada insidentin “radikal millətçi qruplar tərəfindən təxribat və yeni cinayətlər üçün bəhanəyə çevrilə biləcəyindən” narahatlıq ifadə edib.
Rusiya Xarici İşlər Nazirliyi hadisə ilə bağlı Tacikistan tərəfinə və həlak olan məktəblinin ailəsinə başsağlığı verib. Nazirliyin rəsmi nümayəndəsi Mariya Zaxarovanın sözlərinə görə, Rusiya tərəfi hadisənin hərtərəfli və obyektiv şəkildə araşdırılmasını təmin edəcək.
Rusiya mediasının yaydığı məlumatlarda şübhəlinin neonasist məzmunlu kanallara abunə olduğu və hadisədən bir neçə gün əvvəl sinif yoldaşlarına irqçi məzmunlu manifest göndərdiyi bildirilir.
Qeyd edək ki, Rusiyada yüz minlərlə tacik miqrant yaşayır və onların əhəmiyyətli hissəsi Rusiya vətəndaşlığına malikdir. Dünya Bankının məlumatına görə, Rusiyadan Tacikistana göndərilən pul köçürmələri ölkə ÜDM-nin təxminən yarısını təşkil edir.
Son illər miqrasiya siyasətinin sərtləşdirilməsi və təhlükəsizlik tədbirlərinin artırılması fonunda Orta Asiya mənşəli miqrantların vəziyyəti Rusiyada daha həssas mövzuya çevrilib.