BAKI, AzerVoice
Türkiyə ilə Suriya arasında müntəzəm aviauçuşlar bərpa olunur.
AzerVoice xəbər verir ki, Türkiyənin Nəqliyyat və İnfrastruktur naziri Abdulkadir Uraloğlu AJet hava yolları şirkətinin İstanbul və Ankaradan Suriyanın paytaxtı Dəməşqə müntəzəm uçuşlara başlayacağını açıqlayıb.
Nazirin verdiyi məlumata görə, İstanbul Sabiha Gökçen Hava Limanından Dəməşqə ilk uçuş 16 iyun, Ankara Esenboğa Hava Limanından isə 17 iyun çərşənbə axşamı günü həyata keçiriləcək.
Uçuş cədvəli belədir:
İstanbul Sabiha Gökçen – Dəməşq: həftənin bazar ertəsi, çərşənbə, cümə və şənbə günləri (4 dəfə)
Ankara Esenboğa – Dəməşq: çərşənbə axşamı, cümə axşamı və bazar günləri (3 dəfə)
Uraloğlu əlavə edib ki, iyul ayından etibarən İstanbuldan Dəməşqə uçuşların gündəlik, yəni həftədə 7 gün həyata keçirilməsi planlaşdırılır.
Qeyd edək ki, bu addım Türkiyə və Suriya arasında son illərdə aviasiya əlaqələrinin genişlənməsi baxımından mühüm bir inkişaf hesab olunur. Yeni uçuş xətti bölgədə səyahət imkanlarını və iqtisadi əlaqələri gücləndirməyə yönəlib.
