BAKI, AzerVoice

Türkiyədə yay mövsümündə artan meşə yanğınları ilə bağlı aparılan araşdırmalar nəticəsində indiyədək 168 nəfər şübhəli şəxs saxlanılıb.

AzerVoice xəbər verir ki, bu barədə Ədliyyə naziri Yılmaz Tunç özəl televiziya kanalında yayımlanan “Xüsusi müsahibə” proqramında məlumat verib.

Nazirin sözlərinə görə, iyunun 1-dən etibarən meşə yanğınları ilə bağlı cinayət işləri üzrə 168 nəfər istintaqa cəlb edilib. Onlardan 39-u barəsində məhkəmə həbs qətimkan tədbiri seçib.

“Yanğınlarla bağlı istintaq tədbirləri ciddi şəkildə davam etdirilir. Əgər kimsə qəsdən və ya səhlənkarlıq nəticəsində təbiətə və vətəndaşların əmlakına zərər verirsə, bu, qanun qarşısında cavab verməlidir,” – deyə Tunç bildirib.

Nazir əlavə edib ki, meşə yanğınlarının qarşısının alınması və mübarizə tədbirlərinin gücləndirilməsi üçün həm hüquqi, həm də texniki səviyyədə koordinasiyalı işlər aparılır.

Qeyd edək ki, Türkiyənin bir sıra bölgələrində hava temperaturunun artması ilə meşə yanğınlarının sayı çoxalıb. Xüsusilə Egey və Aralıq dənizi sahillərində yüksək risk müşahidə edilir.