BAKI, AzerVoice
Suriya Hava Yolları Türkiyəyə uçuşları tezliklə bərpa edəcək.
AzerVoice xəbər verir ki, Türkiyə
Prezidenti Rəcəb Tayyib Ərdoğan Suriya Hava Yollarının Türkiyəyə
kommersiya uçuşlarını “tezliklə” bərpa edəcəyini təsdiqləyib.
O, bu barədə sosial şəbəkədə paylaşım etsə də, konkret tarix
açıqlamayıb.
Ərdoğan həmçinin qeyd edib ki, Türkiyənin aşağı büdcəli aviaşirkəti AJET yaxın vaxtlarda Suriyaya müntəzəm uçuşlara başlayacaq. Qeyd edək ki, AJET Türk Hava Yollarının törəmə şirkətidir və bu ilin yanvar ayında Suriyaya — Bəşər Əsədin hakimiyyətdən devrilməsindən altı həftə sonra — uçuşları bərpa edib.
Xatırladaq ki, Suriya Hava Yolları 2011-ci ildə ölkədə müharibə başladıqdan sonra Qərbin tətbiq etdiyi sanksiyalar səbəbindən bir çox beynəlxalq marşrutlarını, o cümlədən Türkiyə uçuşlarını dayandırmışdı. Hazırda Türkiyəyə uçuşların dəqiq tarixinin nə vaxt bərpa ediləcəyi açıqlanmayıb.
Prezident Ərdoğan açıqlamasında Türkiyənin Suriyada enerji sahəsində “tezliklə müjdə verəcəyini” də bildirib, lakin ətraflı məlumat verməyib.
Qeyd edək ki, ötən həftə Suriya hökuməti iki türk şirkəti ilə birlikdə Qətər və ABŞ-dan olan iki şirkətin daxil olduğu konsorsiumla 7 milyard dollar dəyərində enerji müqaviləsi imzalayıb. Saziş çərçivəsində ölkənin mərkəzi və şərqində dörd qaz stansiyası, cənubda isə bir günəş elektrik stansiyası tikilməsi planlaşdırılır. Layihənin ümumi gücü 5000 meqavat təşkil edəcək.
